Buǵan deıin, Almatynyń 12 mektebinde jarylǵysh zattar izdestirilip jatqany týraly habarlaǵan bolatynbyz. Keıin «mınalanǵan» mektepter sany 34-ke jetti. Belgisiz adam aqsha aýdarýdy talap etken. Eger aqsha aýdarylmasa, mektepterdi jaryp jiberetinin aıtqan.
«Polısııanyń saperlik bólim qyzmetkerleri 34 mektep boıynsha tekserýdi aıaqtady. Eshqandaı jarylǵysh qurylǵy tabylǵan joq», dedi Almaty Polısııa departamentiniń resmı ókili Saltanat Ázirbek.
Atalǵan fakti QR QK-niń 273-baby boıynsha sotqa deıingi tergeýdiń biryńǵaı tizilimine tirkeldi. Jarylǵysh zat týraly habarlama qaldyrǵan adamnyń jeke basyn anyqtaýǵa jáne ony odan ári ustaýǵa baǵyttalǵan jedel-izdestirý sharalary júrgizilýde.
