TÚRKSOI halyqaralyq uıymynyń bas hatshysy Dúısen Qaseıinov saltanatty is-shara barysynda teatrdyń jetekshi solısteri Jupar Ǵabdýllına, Talǵat Musabaev, konsertmeıster Raýshan Beskembırova, «Astana Opera» sımfonııalyq orkestri vıolonchelder tobynyń konsertmeısteri, mýzyka árleýshi Dáýlet Shákirov jáne taǵy da basqa bir top óner sheberine merekelik medaldi tabys etti.
Qazaqtyń bas aqynyna arnalǵan kitaptyń tanystyrylymy ótip, jınalǵandarǵa syıǵa tartyldy.
– Túrki mádenıetiniń halyqaralyq uıymynyń eńbegimizge keremet baǵa berýi biz úshin zor qurmet. Byltyr jyl boıy indetke baılanysty qıyndyqtarǵa qaramastan, «Astana Opera» teatrynyń ujymy kórnekti oıshyl Abaı Qunanbaıulynyń shyǵarmashylyǵyna arnap mádenı sharalar ótkizdi. Onyń barlyǵy kópshilikke Úlken jáne Kameralyq zal sahnalarynan usynyldy. Jyl boıy afıshamyzdyń sáni bolǵan qazaq ulttyq óneriniń qazynasy – «Abaı» operasy sahnalandy. Budan bólek, teatr foıesinde 175 jyldyqqa arnalǵan «Abaı» operasyndaǵy beıneler» atty kórme ótti, dep atap ótti Talǵat Musabaev.
«Astana Operanyń» Kameralyq zal sahnasyndaǵy marapattaý rásiminde jarqyn baǵdarlamamen óner kórsetken ártister erekshe kóńil-kúı syılady. Atap aıtqanda, Talǵat Musabaev, Jupar Ǵabdýllına, Raýshan Beskembırova men basqa da ónerpazdar Abaıdyń sózine jazylǵan mýzykalyq nómirler usyndy.
Sondaı-aq bul kúni qazaqstandyq ónerdiń ózge de qaıratkerleri – barıton, ustaz Shahımardan Ábilov, dombyrashy, qazaq halyq ári dástúrli ánderdi oryndaýshylar Erlan Rysqalı men Klara Tólenbaeva, kompozıtor, mýzyka árleýshi Tasqyn Jarmuhamet mereıtoılyq medaldarǵa ıe boldy.
