ShQO PD Esirtki qylmysyna qarsy is-qımyl basqarmasynyń qyzmetkerleri «Dármek» jedel-profılaktıkalyq is-sharasy aıasynda №5518 áskerı bóliminiń arnaıy jasaǵymen jáne Jarma aýdandyq ishki ister bóliminiń qyzmetkerlerimen birlesip, Jarma aýdany Qalbataý kentiniń mańynda «Almaty-О́skemen» avtojolynda Volvo-580 markaly avtokólikti ustady.
Atalǵan avtokólik salonynda Jambyl oblysynyń 39 jastaǵy turǵyny men avtokólik júrgizýshisi bolǵan.
– Jeńil avtokólikti tintý barysynda avtokólik ishinen avtomashınanyń eki qosalqy dóńgelegi tabyldy, olardyń ishinen skotchpen oralǵan, keptirilgen marıhýana salynǵan 19 býma tabyldy, – dedi ShQO PD bastyǵynyń orynbasary Talǵat Shaıahmetov.
Tergeý barysynda kúdiktiniń tanysyna mán-jaıdy aıtpaı, onyń avtokóligimen О́skemen qalasyna deıin qosalqy dóńgelekterdi jetkizip berýdi ótingeni anyqtaldy. Buǵan deıin atalǵan er adam polısııa qyzmetkerleriniń nazaryna ilikpegen. Jedel ýákilder kúdiktiniń Jambyl oblysynan esirtki jetkizý arnasyn uıymdastyrýǵa tyrysqanyn anyqtady. Tártip saqshylary esirtki arnasyna qatysy bar adamdardyń jeke basyn anyqtap jatyr.
ShQO boıynsha Sot saraptamasy ınstıtýtynyń qorytyndysyna sáıkes tárkilengen esirtkiniń jalpy salmaǵy shamamen 19,5 kelini quraıdy. Kúdikti qamaýǵa alyndy, QR QK-niń 297-babynyń 3-bóligi (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) boıynsha sotqa deıingi tergeý júrgizilip jatyr. Atalǵan qylmys úshin múlkin tárkileı otyryp, 15 jylǵa deıin bas bostandyǵynan aıyrý jazasy kózdelgen.
