«Ulttyq qundylyqtarymyzdy azamattarymyzdyń, ásirese óskeleń urpaqtyń boıyna sińirýdiń ońtaıly jolyn tabýymyz qajet. Bul rette negizgi salmaq bilim berý salasyna túsetini sózsiz. Bilim berý oqý baǵdarlamasyn túsindirýmen ǵana shektelmegeni jón. Bizdiń ulttyq tanymda bilim árdaıym tárbıemen qatar júrgen. Sondyqtan bala adamdyq álippesin ata-anasymen qatar mektepten úırengeni shart. Bilim mekemeleri janashyr, adal, jaýapty, eńbekqor bolýdy erte jastan balanyń boıyna sińirýge tıis. Sol sebepti, oqý baǵdarlamasyna ulttyq qundylyqtardy dáripteý sabaqtaryn qosyp, ony jańasha jasaqtaý máselesin qaraǵan jón bolar edi», dedi Máýlen Áshimbaev.
Sonymen qatar Senat Spıkeri bul baǵytta ıntellıgensııanyń da alatyn orny erekshe ekenin atap ótti.
«Qaı zamanda da zııaly azamattarymyz qoǵam úshin baǵdar bolǵan. Aldyńǵy aǵa býyn osy baǵyttaǵy mıssııasyna adaldyq tanytyp, árdaıym ultymyzdyń úni, qorǵaýshysy bolyp keledi. Sol úshin olarǵa alǵysymyzdy bildiremiz. Endigi kezekte, elimizde zııaly qaýymnyń jańa býynyn qalyptastyrýdy ózekti máselelerdiń biri dep esepteımiz. Olar HHI ǵasyrda ulttyq qundylyqtardy saqtaýshy jáne nasıhattaýshy bolýy qajet», dedi Máýlen Áshimbaev.
Sondaı-aq, ol ulttyq qundylyqtardyń aıasy keń ekenin, onyń táýelsizdik, jer, til, mádenıet, salt-dástúr sııaqty erekshelikterdi qamtıtynyn aıtyp, adamı qundylyqtarǵa, hakim Abaıdyń «Tolyq adam» tujyrymdamasyna keńirek toqtalyp ótti.
«Uly oıshyldyń «Tolyq adamyna» nurly aqyl, jyly júrek, ystyq qaırat tán. Nurly aqyl aıasynda qoǵamda bilim kýltin qalyptastyrýymyz qajet. Sol arqyly ómir boıy bilim alý daǵdysyn negizgi qaǵıdatqa aınaldyrǵanymyz jón. О́zara senim, janashyrlyq pen jaýapkershilik sııaqty qundylyqtardy da keńinen dáriptegen abzal. Onyń bári Abaı aıtqan jyly júrekten bastaý alady. Qoǵamda senim bolǵan jerde adamı qarym-qatynastyń nyǵaıýymen qatar, ekonomıka da damıdy degen zańdylyq bar. Aqyn ósıet etken ystyq qaıratqa talap pen eńbekqorlyq sekildi qasıetter jatady. Bular da jańa zamanda ulttyq ustanymǵa, ómirlik maqsatqa aınalýy qajet», degen Senat Tóraǵasy Memleket basshysynyń jańǵyrý baǵdaryn keshendi ári júıeli túrde iske asyrý úshin osyndaı ıdeologııalyq qundylyqtardy nyǵaıtyp alý kerektigin tilge tıek etti.
О́z sózinde Máýlen Áshimbaev ulttyq qundylyqtar taqyryby qashanda ózekti jáne ony dáripteý aýqymdy jumys ekenine de nazar aýdardy.
«Qazirgideı elimizde júıeli jańǵyrý jumystary qolǵa alynǵan shaqta bul salanyń mańyzy arta túskeni sózsiz. Tipti, ulttyq qundylyqtardy dáriptemeı jańǵyrýdy tolyqqandy iske asyrý múmkin emes deýge bolady. Sebebi, jańǵyrýdyń eń negizgi maqsattarynyń biri jahandaný jaǵdaıynda ulttyq biregeılikti saqtap, jan-jaqty damý ekeni belgili. Sondyqtan búgingi máseleniń eldik múdde turǵysynan mańyzy asa zor», dedi Senat Tóraǵasy.
Aıta keteıik, Senatta ótken parlamenttik tyńdaýdyń qorytyndysy boıynsha arnaıy Usynymdar daıyndaldy. Bul qujat qatysýshylardyń usynys-pikirleri negizinde taǵy da tolyqtyrylyp, Úkimetke jáne tıisti mınıstrlikterge jiberiledi.
