Balyqshylar Jaıyq ózeniniń tómengi saǵasynan salmaǵy 150 keli tartatyn bekireni aýlady.
Seriktestiktiń balyq aýlaý brıgadasynyń jetekshisi О́mirzaq Ázbergenovtiń aıtýynsha, bekire tuqymdas alyp balyq 29 naýryzda keshkisin aýǵa túsipti. Balyqshylar ony bekire tuqymdas balyqtar shabaǵyn ósirý jónindegi memlekettik tapsyrys aıasynda aýlaǵan. Balyq Jaıyq-Atyraý bekire shabaǵyn ósirý zaýytyna jetkizdi.
«Bekire tuqymdas balyqtyń salmaǵy – 150 keli, uzyndyǵy – 2 metr 44 sm. Bizdiń mamandar ýltradybystyq skanerdiń kómegimen bekireniń analyq ekeni, qara ýyldyryǵy baryn anyqtady. Qara ýyldyryǵy bar balyq zaýyttyń toǵanynda bolady. Odan jasandy jolmen qara ýyldyryq alynady. Sodan soń ony Kaspıı teńizine – tabıǵı ortaǵa qaıta jiberemiz» deıdi zaýyt dırektory Ǵılman Sársemalıev.
