Álemde COVID-19 aýrýy men ólim-jitim boıynsha jaǵdaı shıelenise túsýde. Búginde álemniń 221 elinde 129 mln astam KVI jaǵdaıy tirkelgen, aýrýshańdyqtyń ósýi – 0,5. 2,8 mln astam adam qaıtys boldy, ólim kórsetkishi 2,2% qurady. 2021 jyldyń qańtarynda syrqattanýshylyqtyń jalpy álemdik statıstıkasy azdap tómendegennen keıin, aqpan aıynan bastap turaqty ósý úrdisi baıqaldy.
«Jalpy respýblıka boıynsha bıyl naýryz-sáýir aılarynda aýrýdyń naqty boljamy týra keldi. Sońǵy 10 kúnde respýblıkada KVI juqtyrǵan 15 156 adam tirkeldi, naýryzdyń basymen salystyrǵanda syrqattaný deńgeıi 2,0 ese ósti, ásirese Almaty, Nur-Sultan qalalarynda, Almaty, Aqtóbe, Atyraý, Qaraǵandy, Batys Qazaqstan oblysynda naýqas sany kóp», dedi A.Soı.
1 sáýirdegi jaǵdaı boıynsha KIV juqtyrǵan naýqastarǵa medısınalyq kómek kórsetý úshin respýblıkada 25 893 tósek-oryn bar , 258 ınfeksııalyq stasıonar tartylǵan. Onyń 33% pasıent jatyr. Reanımasııalyq tósek-oryn sany – 2394, jalpy orynnyń 20%.
«Naýryzda da ólim-jitimniń ósýi baıqalady, KVI-den 288 naýqas qaıtys boldy, onyń ishinde sońǵy 2 aptada ólim-jitim 2,7 ese ósti. Naýryz aıyndaǵy ólim-jitimniń 74% 4 óńirde – Almaty qalasy, Nur-Sultan qalasy, Batys Qazaqstan jáne Qaraǵandy oblystarynda bolǵan», dep habarlady mınıstr.
О́ńirlerde ınfeksııalyq oryn rezervi 51 myń tósekti quraıdy, jumys istep turǵan ınfeksııalyq stasıonarlardyń júktemesi 70% jetken kezde rezervtik obektiler tartylatyn bolady, bul rette josparly mamandandyrylǵan medısınalyq kómek kórsetý jalǵasady. Mınıstrlik óńirdegi árbir medısınalyq uıymdaǵy tósek qorynyń paıdalanylýyn monıtorıng júrgizýdiń elektrondyq júıesin ázirledi, bul qosymsha stasıonarlardyń ýaqtyly áreket etýine múmkindik beredi.
Sonymen qatar KVI-ge testileý zerthanalarynyń qýatyn arttyrý boıynsha jumys jalǵasýda. Búginde KVI testileýdi 154 zerthana júzege asyrady, testileýdiń jalpy qýaty táýligine 112 myń testti quraıdy. Barlyq zerthanalar, sonyń ishinde jeke zerthanalar biriktirildi, bul COVID-19 úshin PTR testileý nátıjeleriniń biryńǵaı derekqoryn qalyptastyrýǵa múmkindik berdi. A.Soı vırýstyń taralý jyldamdyǵy vırýs genomyndaǵy ózgeristermen baılanysty ekenin aıtty. Jańa mýtasııalardy anyqtaý maqsatynda biz turaqty negizde respýblıka aýmaǵyndaǵy KVI shtammdaryna genetıkalyq zertteý júrgizemiz.
Naýryzda 265 genotıp zertteldi, onyń 12 úlgisinde brıtandyqtarǵa tıesili vırýs anyqtaldy, onyń 8-i ımporttalǵan. Bul shtammnyń aınalymy Almaty, Nur-Sultan qalalarynda jáne Aqtóbe oblysynda anyqtaldy. Almaty qalasynda «Ońtústik Afrıka» shtammynyń aınalymy belgilengen.
Sonymen qatar, naýryz aıynan bastap búkil álemde úsh shtammnyń yqtımal mýtasııasyn anyqtaýdyń ekspress ádisi júrgizilýde. 357 úlgi zertteldi, onyń ishinde 13 óńirdiń 87 synamasynda «Brıtandyq» jáne «Ońtústik afrıkalyq» shtammdarǵa tán yqtımal mýtasııa anyqtaldy.
«Qasym-Jomart Kemeluly, Sizdiń tapsyrmańyzǵa sáıkes, 2021 jylǵy 1 aqpannan bastap KVI-ge qarsy vaksınasııalaý bastaldy. Vaksınasııa aldymen KVI-men kúresip júrgen mamandarǵa salyndy. Bul taktıka álemniń kóptegen elderinde qoldanylady. 2 aı ótken soń, KVI-ge qarsy vaksınasııa óziniń tıimdiligi men qaýipsizdigin kórsetti, sondaı-aq halyq arasynda senimdi arttyrdy. 1 sáýirdegi jaǵdaı boıynsha 300 myń azamatqa vaksınasııanyń qoljetimdiligi qamtamasyz etildi. Sáýir aıynyń ishinde reseılik vaksınanyń qosymsha 2 mln astam dozasynan jetkizý josparlanýda. Birinshi jartyjyldyqtyń sońyna deıin 6 mıllıonǵa jýyq qazaqstandyqty vaksınasııalaý josparlanǵan», dedi Densaýlyq saqtaý mınıstrliginiń basshysy.
Vaksınanyń bul kólemi KVI-ge qarsy vaksınasııalaýǵa jatatyn kontıngentti jáne óteýsiz negizde barlyq nıet bildirýshilerge vaksınasııanyń qoljetimdiligin barynsha keńeıtýge múmkindik beredi.
Mınıstr sondaı-aq Qazaqstanda aýqymdy vaksınasııa júrgizý tájirıbesi bar ekenin atap ótti. Buǵan deıin elde bir aıda 2 mıllıonnan astam azamat tumaýǵa qarsy vaksınasııalandy. El aýmaǵynda anyqtalǵan mýtasııalanǵan shtammdardy eskere otyryp, biz epıdemııalyq jaǵdaıdyń boljamyn jańarttyq.
Osylaısha, pessımıstik ssenarıı boıynsha 2021 jyldyń sáýir-maýsymynda tirkelgen jaǵdaılardyń sany shamamen 370 myń adamdy quraıdy, aýrýhanaǵa jatqyzý 190 myń adamdy qajet etedi. Ekinshi realıstik ssenarıı boıynsha 2021 jyldyń sáýir-maýsymynda tirkelgen jaǵdaılardyń boljamdy sany shamamen 250 myń adamdy quraıdy, aýrýhanaǵa jatqyzýǵa 127 myń adam qajet bolady.
Optımıstik ssenarıı boıynsha 2021 jyldyń sáýir-maýsymynda tirkelgen jaǵdaılardyń sany shamamen 140 myń adamdy quraıdy, aýrýhanaǵa jatqyzýǵa 71 myń adam qajet bolady.
«Mınıstrlik eldegi jáne álemdegi epıdemııalyq ahýalǵa turaqty monıtorıng júrgizedi, sonyń negizinde medısınalyq uıymdardyń koronavırýs ınfeksııasymen syrqattaný deńgeıiniń ósýine daıyndyǵyn arttyrý boıynsha sharalar qabyldanady. Densaýlyq saqtaý júıesi epıdemııanyń ssenarııi boıynsha júktemeni jeńe alady. Osyǵan baılanysty shekteý sharalary jergilikti jáne eldik deńgeıde de, óńirlik deńgeıde de saralanǵan túrde qabyldanady», dedi mınıstr.
Onyń pikirinshe, vaksınasııa qarqynyn arttyrý shekteý sharalaryn azaıtýǵa jáne pandemııaǵa deıingi kezeńdegi qoǵamǵa oralýǵa múmkindik beredi.
