Halyqaralyq teatr kúnine oraı uıymdastyrylǵan óner baıqaýyna Sh.Aıtmatovtyń qýyrshaqtar tilinde sóılegen «Ana – Jer-Ana» qoıylymymen qatysqan ónerli ujym qazylar alqasynyń joǵary baǵasyn alyp, jeńis tuǵyrynan kórindi.
Jyl saıyn teatr salasynyń úzdikterin anyqtaıtyn ulttyq teatr baıqaýynyń irikteý kezeńi bıyl onlaın formatta ótti. Ujym «Qyrǵyz avtorynyń shyǵarmasyn eń úzdik sahnalaǵan sheteldik teatr» atalymy boıynsha synǵa tústi. Qoıylym «Adamzattyń Aıtmatovy» atanǵan qarymdy qalamgerdiń «Qus joly» povesiniń negizinde Dına Jumabaeva rejıssýrasymen 2018 jyly sahna kórip, qýyrshaq teatry ártisteriniń ózge qyryn ashyp, sahnada sony izdenis izderin kórsetýine keń jol ashqan bolatyn. Nátıjesinde qazaqstandyq teatr dúldúlder alamanynda úzdik dep tanylyp, Qyrǵyzstan Respýblıkasynyń ulttyq teatr júldesine ıe boldy. Marapatty Qyrǵyzstan Respýblıkasynyń Mádenıet mınıstri Qaırat Imanálıev pen Qyrǵyzstan teatr qaıratkerleri odaǵynyń prezıdenti Janysh Qulmambetov tapsyrdy. Jaryq kórgeli birneshe halyqaralyq teatr festıvalderdiń básekesinde top jaryp júrgen spektakldiń kúlli adamzatqa aıtar oıy, kórkemdik qundylyǵy zamana alǵa jyljyǵan saıyn artpasa, tıtteı de kemigen emes. Oǵan aıtýly qoıylymnyń mereıli mezeti kýá.
Iá, búginde jańa baǵytqa batyl bet buryp, tosyn tájirıbeler jasaýdan jasqanbaıtyn Memlekettik qýyrshaq teatry óz repertýarynan álem jáne qazaq ádebıetiniń tańdamaly týyndylaryna keńinen oryn berip, jemisti eńbek etýde. Álbette, ózge de óner oshaqtary sekildi álemdi sharpyǵan indettiń ártister izdenisine aıtarlyqtaı kedergisin keltirgenine qaramastan, Qýyrshaq teatry óziniń shyǵarmashylyq qarymyn tıtteı de báseńsitken emes. Onyń aıqyn dáleli – ujym bir jyl ishinde eresekterge arnalǵan «О́mir-ózen», «Makbet.Illıýzııa» qoıylymdaryn sahna tórine shyǵarsa, «Kúlshe qyz», «Qasqyr men jeti laq» jáne «Úıshik» ertegileri kishkentaı kórermender úshin tamasha tartý bolǵany sózsiz.
Tek qýyrshaq óneriniń ǵana emes, tutas qazaq teatrynyń mereıin ósirip, mártebesin asqaqtatyp, jeńisti júldeler qataryn kóbeıtip kele jatqan teatrdyń shyǵarmashylyq qarqyny búginde shyn máninde kóńil qýantady. Atap aıtsaq, talantty trýppa jyl basynda Halyqaralyq teatr synshylary birlestiginiń (IUTC) úsh birdeı atalym boıynsha taǵaıyndaǵan júldesin enshilep, qanjyǵa maılasa, odan bólek halyqaralyq deńgeıdegi birneshe teatr festıvaline de shaqyrtý alyp úlgerdi. Munyń barlyǵy kishkentaı kórermenniń kórkem tanymyn qalyptastyrý jolynda qaltqysyz eńbek etýshi uıymshyl ujymynyń óreli óneriniń jemisi ekeni sózsiz.
