Qazaq ádebıetinde aıryqsha orny bar jazýshynyń prozalyq shyǵarmalarynda negizinen jetpisinshi, sekseninshi jyldardaǵy el tirshiligi sýrettelip, qoǵamdyq ahýal kórinisterindegi qarapaıym turmystyq epızodtardyń ózinen úlken áleýmettik máseleler utymdy jetkiziledi. Al ataqty «Tar kezeń» romany ult tarıhyndaǵy uly tulǵalardyń biri Syrym Datuly týraly jazylǵany belgili.
– Qazaqtyń kórnekti jazýshysy Qajyǵalı Muhanbetqalıuly aǵamyzdyń atyna oqý zalynyń ashylǵany bizdi óte qýantyp otyr. Bul – ulttyq akademııalyq kitaphananyń bizdiń qalamgerlerimizge kórsetip jatqan qurmeti. Kitaphanada klassık Ábish Kekilbaevtyń, ǵalym, ádebıettanýshy Tursynbek Kákishevtiń, jazýshy Dúkenbaı Dosjannyń, ádebıettanýshy Myrzataı Joldasbekovtiń oqý zaly bar. Qazaq rýhanııatyna, sonyń ishinde ádebıetimizge zor úles qosqan azamattardyń esimi berilgen kabınetter ashylyp jatyr. Bul tek mýzeı retinde esigi jabyq turatyn oqý zaldary emes, syrttan kelgen oqyrmandardyń barlyǵy ózderine kerek kitapty qarap, bilimge, ǵylymǵa den qoıýǵa jaǵdaı jasalǵan dúnıe, – dedi Qazaqstan Jazýshylar odaǵy Nur-Sultan qalalyq fılıalynyń dırektory, aqyn Dáýletkereı Kápuly. Jazýshynyń jubaıy Sulýhanym Fatıhaqyzy óziniń jary týraly esteliktermen bólisip, Qajyǵalı Muhanbetqalıulynyń atyna ashylyp jatqan oqý zaly úshin Ulttyq akademııalyq kitaphanaǵa zor rızashylyq bildirdi.
Jıynǵa jazýshynyń jaqyn dosy, jazýshy, Memlekettik syılyqtyń laýreaty Tólen Ábdik, pýblısıst Oraz Qaýǵabaı, fılologııa ǵylymdarynyń kandıdaty Qaırat Saq, «Altyn Qazyna» qoǵamdyq birlestiginiń tóraǵasy Erbol Beıilhan jáne ózge de jastar qatysty.
