Jyldyń basynan beri Jambyl oblysynyń polıseıleri 45 iz-túzsiz joǵalǵan kámeletke tolmaǵan jasóspirimdi izdestirdi. Onyń 40-y kezekshi táýlikte tabyldy. Qalǵandarynyń turǵan jeri birneshe kún ishinde anyqtaldy.
Qolda bar statıstıkaǵa súıene otyryp, polısııa balalar men jasóspirimderdiń óz erkimen ketýiniń kelesidegideı negizgi sebepterin anyqtady. Olardyń qataryna: ata-analarmen, muǵalimdermen, tárbıeshilermen jáne qatarlastarymen qaqtyǵys, balanyń psıhıkalyq damýyndaǵy aýytqý, ata-analar tarapynan baqylaýdyń bolmaýy jatady.
Kezdeısoq ketip qalý áreketi sırek kezdesedi, balalar turǵylyqty jerin taba almaı, avtobýspen serýendep nemese úıden alys jerde adasyp ketedi.
«Balalaryńyzǵa muqııat jáne ádil bolyńyz, olardyń máselelerin birge sheshińiz, sodan keıin sizdiń balańyzdyń úıden ketip qalýy ekitalaı. Alaıda, eger sizdiń balańyz úıden óz erkimen ketip qalsa, onda siz onyń barlyq tanysy men dostaryna dereý qońyraý shalýyńyz kerek. Úıdegi aqsha men qundy zattardyń bar-joǵyn tekserińiz. Ol qandaı kıimmen ketkenin jáne ózimen birge ne alǵanyn anyqtaýǵa tyrysyńyz. Eger siz balanyń úıden sanaly túrde ketýiniń belgisin kórmeseńiz, shuǵyl túrde polısııaǵa habarlasyńyz. О́zińizben birge balanyń kámeletke tolmaǵany týraly qujattaryn, sýretin ákelip, ótinish jazýyńyz qajet», dep habarlady vedomstvo ókilderi.
