Eýropa chempıonatyna joldama aldy

Sport • 08 Sáýir, 2021

Eýropa chempıonatyna joldama aldy

Fýtzaldan Qazaqstan ulttyq quramasy 2022 jyly Nıderlandta ótetin Eýropa chempıonatynyń irikteý kezeńi aıasynda syrt alańda Majarstan fýtzalshylaryn utyp, merziminen buryn qurlyq dodasyna joldama jeńip aldy. Bul – Qazaqstan quramasynyń óz tarıhynda úshinshi márte Eýropa chempıonatyna shyǵýy.

Álı BITО́RE

Býdapeshtte ótken oıyn Kaka baptaıtyn Qazaqstan fýtzalshylary úshin irikteý kezeńindegi kezekti match bolǵanymen, merziminen buryn Eýropa chempıonatynyń fınaldyq kezeńine shyǵý máselesin sheship tastaıtyn tamasha múmkindik edi. Osyndaı mańyzdy básekeni syrt alańda ótkizgenine qaramastan, jerlesterimiz Majarstan quramasynyń tas-talqanyn shyǵaryp, alǵa qoıǵan maqsatyna jetti.

Amalııa Sterbınskı atyndaǵy sport kesheninde ótken kezdesýdiń birinshi kezeńinde Qazaqstan quramasynan Shyńǵys Esenamanov, Azat Valıýllın jáne Taınan qarsylastar qaqpasyn dál kózdese, Imre Nod óz qaqpasyna gol soǵyp, avtogoldyń avtory atandy. Ekinshi kezeńde de Kaka jetekshilik etken bizdiń komanda óz qarqynyn báseńdetken joq. Match sońyna deıin bizdiń jigitter Majarstan quramasynyń qaqpasyna taǵy eki gol soqty. Bul goldardy Dýglas Jýnıor men Albert Aqbalyqov saldy. Oıynnyń 24-mınýtynda Almatynyń «Qaırat» fýtzal klýbynda eks-oıynshysy Zoltan Dort alań ıeleriniń jalǵyz golyn soqty. Qorytyndy esep – 6:1. Qazaqstan quramasynyń paıdasyna.

Osylaısha, syrt alańda Majarstandy iri eseppen jeńgen Qazaqstan quramasy tórt kezdesýden keıin 12 upaı jınap, óz tobynda birinshi oryn aldy. Osy jeńis arqyly asynda otandastarymyz «Eýro-2022» dodasynyń joldamasyna ıelik etti.

Eýropa chempıonatyna irikteý kezeńi aıasyndaǵy eki qurama arasyndaǵy alǵashqy kezdesý 2020 jyldyń 11 jeltoqsanynda Nur-Sultanda ótip, onda Qazaqstan quramasy qart qurlyqtan kelgen qarsylastarynyń qaqpasyna jaýapsyz bes gol soǵyp, iri eseppen jeńgen edi. Bul básekede el quramasynan Arnold Knaýb, Dáýren Nurǵojın, Albert Aqbalyqov, Dáýren Tursaǵulov mergendigimen kózge túsken bolatyn.

Jerlesterimiz keıingi eki kezdesýin naýryz aıynda Belarýs quramasymen ótkizdi. Alǵash elordadaǵy Jaqsylyq Úshkempirov atyndaǵy jekpe-jek saraıynda ótken básekede jerlesterimiz qarsylastarynan 5:2 esebimen aılasyn asyrsa, araǵa bir apta salyp Mınskide uıymdastyrylǵan matchta Qazaqstan quramasy 6:1 nátıjesimen basym tústi.

Endi Qazaqstan fýtzalshylary toptyq kezeńdegi sońǵy oıynyn Nur-Sultan qalasynda 9 jáne 11 sáýir kúnderi Izraılmen ótkizedi. Negizi áý basta birinshi oıyn 28 qańtarda Izraıldiń Rıshon-le-Sıon qalasynda ótýi tıis edi. Alaıda epıdemııalyq jaǵdaıǵa baılanysty match keıinge shegerilgen bolatyn. Keıinnen ÝEFA sheshimi boıynsha eki oıyn da Nur-Sultanda ótetin bolyp bekitildi. Izraılmen ótetin match Qazaqstan quramasyna esh mańyzy joq oıyn bolsa da, bas bapker alańǵa tek jeńis úshin, jankúıerlerdi qýantý úshin shyǵamyz dep otyr.

Jalpy, 2022 jyly ótetin Eýropa chempıonatynyń irikteý kezeńi bıyl alǵash ret jańa formatta ótip jatyr. Atap aıtar bolsaq, irikteý saıysynda 32 eldiń quramasy tórt-tórtten segiz topqa bólinip, «úıde» jáne «túzde» júıesi boıynsha ózara sheberlik baıqasýda. Erejege sáıkes ár topta kósh bastaǵan ulttyq quramalar qart qurlyqtyń basty jarysynyń joldamasyna birden ıelik etedi. Ekinshi oryn alǵandar arasynda eń kóp upaı jınaǵan alty komanda da Eýropa chempıonatyna qatysady. Qalǵan bir komanda qosymsha kezdesý arqyly anyqtalady. Jarys qojaıyny sanalatyn Nıderland quramasyn qosa eseptegende, kelesi jylǵy dop dodasyna 16 qurama qatysady.

Dál qazirgi jaǵdaı boıynsha óz toptarynda birinshi oryn ıelengen Ázerbaıjan, Bosnııa jáne Gersegovına, Ispanııa, Italııa, Qazaqstan, Nıderland, Reseı jáne Horvatııa quramalary Eýropa chempıonatyna joldama alyp qoıǵan. Al Eýropa chempıonaty 2022 jyldyń 19 qańtary men 6 aqpany aralyǵynda Nıderlandtyń Amsterdam jáne Gronıngen qalalarynda ótedi.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz