Bul syılyq medısına jáne densaýlyq salasy boıynsha qazaq tilinde jaryq kórgen ózekti materıaldarǵa ár toqsan saıyn taǵaıyndalatynyn aıtyp ótken jón.
Konkýrsqa qatysýshylardyń ishinen muǵalim-defektolog Ásel Maralbektiń dalanews.kz portalyna shyqqan «Aýtızmdi erte anyqtaý – jaqsy nátıjege qol jetkizedi» maqalasy konkýrstyq kommıssııa músheleriniń sheshimi boıynsha úzdik atandy.
Jeńimpazǵa «Tóregeldi Sharmanovtyń halyqaralyq qory» QQ atynan arnaıy aqshalaı syıaqy men dıplom tabystalady.
Akademık Tóregeldi Sharmanov syılyǵyn alý konkýrsyna qatysý úshin ótinim berý jalǵasýda. II toqsandaǵy ótinim berý merzimi 30 maýsymǵa deıin.
Konkýrsqa densaýlyq saqtaý jáne túrli aýrýlardyń aldyn alý, sondaı-aq densaýlyq pen medısınaǵa qatysty qyzyqty jáne mańyzdy aqparattardy qamtıtyn qazaq tilindegi jobalar nemese buryn jarııalanǵan materıaldar qabyldanady. Materıaldar qysqa ǵylymı-kópshilik maqala, shaǵyn beınerolık, komıks nemese ınfografıka formatynda bolsa qatysa alady.
Bul syılyqty taǵaıyndaý krıterııleri retinde materıaldyń ózektiligi men paıdalylyǵy, jarııalanymnyń ǵylymı negizdiligi jáne anyqtyǵy, túpnusqa býyn jáne prezentasııa stıli, medısınalyq bilimi joq oqyrmandardyń túsinýine ońaı bolýy, taqyrybyn qamtý deńgeıi (saıttaǵy oqylym sany, áleýmettik jelilerdegi belsendilik, oqyrmandarmen qarym-qatynas), barlyq avtorlyq quqyqty saqtaý (plagıattyń bolmaýy) sııaqty talaptar qoıylady.
Jazbasha materıaldaǵy kólem talaby – 1000-nan 4000-ǵa deıin baspa belgisi, al YouTube-tegi vıdeolar úshin talap – uzaqtyǵy 5 mınýtqa deıin.
Bul syılyqty berýdegi maqsat – medısına jáne densaýlyqqa qatysty ózekti málimetterdi barshaǵa, ásirese qazaq tildi oqyrmanǵa keńirek jetkizýge baǵyttalǵan taqyryptaǵy materıaldardy qoldaý. Atalmysh syılyq týraly, irikteýdiń negizgi talaptary, syılyqaqy mólsheri jáne ótinim berý merzimderi týraly tolyq aqparatty osy siltemeden oqı alasyzdar: https://academypm.org/language/ru/akademik-sharmanov-syiligin-beru-turaly-erezhe/
Qosymsha suraqtar týyndaǵan jaǵdaıda 8 702 575 76 48 telefon nómirine nemese sharmanovfund@gmail.com elektrondyq pochtaǵa hat joldasańyz bolady.
