Mınıstrliktiń málimetinshe, búgin Memleket basshysy «Týrıstik salany jáne balalar sportyn qoldaý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Qujat balalar men jasóspirimder sport mektepterin jan basyna shaqqandaǵy normatıvtik qarjylandyrý júıesin engizýdi kózdeıdi.
Memleket basshysynyń tapsyrmasyn oryndaý aıasynda Týrızm jáne sport mınıstrligi balalar men jasóspirimder sportyn qarjylandyrý júıesin jańǵyrtýǵa baǵyttalǵan tıisti zań jobasyn ázirledi.
«Jan basyna shaqqandaǵy qarjylandyrý júıesine kóshý balalar men jasóspirimder sportyn qamtamasyz etý deńgeıin arttyrýǵa múmkindik beredi. Atap aıtqanda, balalar men jasóspirimder sport mektepterinde bir sportshyny qamtamasyz etýge jylyna orta eseppen 415 myń teńge bólinedi. Qazirgi ýaqytta smetalyq qarjylandyrý kezinde bul kórsetkish orta eseppen 233 myń teńgeni quraıdy», delingen habarlamada.
Aıta ketý kerek, osy ýaqytqa deıin Týrızm jáne sport mınıstrligi smetalyq qarjylandyrý júıesin qoldanatyn jalǵyz memlekettik organ bolyp keldi. Osyǵan baılanysty salany basqarý tıimdiligin arttyrý maqsatynda jan basyna shaqqandaǵy qarjylandyrý júıesine kóshý josparlanyp otyr.
Prezıdent 2026 jylǵy áskerge shaqyrý týraly Jarlyqqa qol qoıdy
«Jobany iske asyrý jergilikti bıýdjetterden qosymsha qarajat bólýdi talap etedi. Atalǵan shyǵystar Respýblıkalyq bıýdjet komıssııasynyń sheshimimen qoldaý tapty, qosymsha qarajat jergilikti bıýdjetter esebinen bólinedi. Elimizdegi barlyq balalar men jasóspirimder sport mektepterinde jan basyna shaqqandaǵy normatıvtik qarjylandyrý júıesin engizý 2026 jylǵa josparlanyp otyr», delingen habarlamada.
