«Tazalyqtyń tiregi – tárbıe. Balalardy ekologııalyq mádenıet pen eńbekke mektep jasynan baýlý qajet. Sondyqtan ekologııalyq aksııalarǵa oqýshylar men stýdentterdiń belsene qatysqany jón. Osyǵan oraı, Oqý-aǵartý mınıstrligine «Jasyl sabaqtar» jobasyn qabyldaýdy tapsyramyn. Bilim ordalarynda sýdy jáne qýat kózin únemdeý, qorshaǵan ortany qorǵaý isin dáripteıtin bastamalardy qolǵa alý qajet. Sondaı-aq oqýshylar men stýdentterdiń ekologııa máselesine arnalǵan ǵylymı izdenisterine jan-jaqty qoldaý kórsetý kerek. «Taza Qazaqstan» halqymyzdy jańa sapalyq deńgeıge kóteretin ulttyq ıdeıa bolýǵa tıis. Ony qoǵamda tereń ornyqtyrý úshin mádenıet salasynyń, ásirese, kreatıvti ındýstrııanyń áleýetin barynsha paıdalanǵan jón. Eńbekqorlyq, uqyptylyq, adaldyq, jasampazdyq qundylyqtary fılmder, serıaldar arqyly da nasıhattalýǵa tıis. Bul jumysta buqaralyq aqparat quraldary men áleýmettik jeliniń de múmkindigin durys qoldaný kerek», dedi Memleket basshysy.
Prezıdent qazir elimizde túbegeıli ózgeristerdi qolǵa alynyp, aýqymdy reformalar júzege asyrylyp jatqanyn málimdedi.
«Naýryz aıynda ótken respýblıkalyq referendýmda jańa Konstıtýsııamyzdy qabyldadyq. Osylaısha, el tarıhynyń jańa paraǵyn ashtyq. Bizdiń túpki maqsatymyz – «Zań men tártip» qaǵıdaty berik ornyqqan qaýipsiz jáne ádiletti qoǵam qurý. Jas urpaqqa, ıaǵnı sizderge órkenıetti, bedeldi, damyǵan memleketti amanat etip qaldyrý. Osy jolda bárimiz tabandy eńbek etýimiz kerek. Al Otanǵa qyzmet qarapaıym dúnıelerden bastalady. Tal egý, aınalańdy taza ustaý arqyly elge paıdaly bolýǵa, ıaǵnı ultqa qyzmet etýge bolady. Men jastardyń, eriktilerdiń elimizdi kórkeıtýge qosqan orasan zor úlesin joǵary baǵalaımyn. Adal eńbekterińizdi erekshe qurmetke laıyq dep sanaımyn. Tazalyq – eń aldymen, ishki mádenıettiń ólshemi. Oı-nıeti jáne ary taza adam eshkimge eshqashan qııanat jasamaıdy, ondaı adam elin de satpaıdy. Tártipke baǵynyp, túzý joldan da adaspaıdy. Aınalasyna qamqor, jaqyndaryna janashyr bolady. Eldiń kóshin alǵa bastap, ult sapasyn jaqsartýǵa atsalysady. Men bárińizdi dál osyndaı azamat dep esepteımin. Barshańyzǵa taǵy da sáttilik tileımin!», dedi Qasym-Jomart Toqaev.
Eske sala keteıik, búgin Memleket basshysy «Taza Qazaqstan» respýblıkalyq ekologııalyq aksııasyna qatysyp, jastarǵa rızashylyǵyn bildirdi.
