Global Times basylymynyń habarlaýynsha, bul týraly 16 naýryzda ótken brıfıngte Qytaı SIM-niń resmı ókili Lın Szıan málimdedi. Baspasóz konferensııasy barysynda Qytaıdyń Ortalyq televıdenıesiniń jýrnalısi 15 naýryzda Qazaqstanda ótken jalpyhalyqtyq referendýmǵa Qytaı tarapynyń baǵasy týraly suraq qoıǵan.
Lın Szıan Qazaqstan referendýmdy sátti ótkizgenin atap ótip, Qytaı tarapy osyǵan baılanysty quttyqtaýyn bildiretinin aıtty. Onyń sózinshe, Qytaı dostas kórshi jáne jan-jaqty strategııalyq seriktes retinde Qazaqstannyń uzaq merzimdi turaqtylyq pen qoǵamdyq órkendeýdi saqtap otyrǵanyn qýanyshpen qabyldaıdy.
Sonymen qatar ol Beıjińde Qasym-Jomart Toqaev basshylyǵymen Qazaqstan memlekettik qurylysta jańa eleýli jetistikterge qol jetkizetinine senimdi ekenin jetkizdi. Sondaı-aq «Ádiletti Qazaqstan» qurý maqsaty tabysty júzege asatynyna senim bildirildi.
Qytaı SIM ókili Qytaı Qazaqstanmen ekijaqty qarym-qatynastardy damytýǵa úlken mán beretinin aıtyp, ózara tıimdi yntymaqtastyqty nyǵaıtyp, qazaq-qytaı seriktestigin jańa deńgeıge kóterýge daıyn ekenin atap ótti.
Aıta keteıik, buǵan deıin Memleket basshysyna respýblıkalyq referendým nátıjesine oraı quttyqtaý jedelhattary túsip jatqanyn habarlaǵan edik.
