OŃTÚSTIKKE JETÝDIŃ QIYNY-AI!

deıdi jol azabyn tartyp júrgen qostanaılyqtar Qostanaıdan elimizdiń ońtús­tigine qaraı “Qostanaı–Almaty” poıyzy ǵana júredi. Munyń ózi Shý stansa­syna toqtaǵannan keıin elimizdiń ońtústik-shyǵysyna qaraı ketedi. Al jolaýshyǵa Qostanaıdan elimizdiń ońtús­tiginde jatqan Taraz, Shymkent nemese Qyzyl­orda qala­laryna jetý úshin 2,5 táýlik ýaqyt kerek. Olar aldymen Astana qala­syna jetip alady. Odan “Pavlo­dar–Sary­aǵash”, “Kókshe­taý-Qy­zylorda”, “Astana-Sary­aǵash” poıyz­darynyń júretin ýaqy­tyna deıin sarǵaıyp kútedi. Jolaý­shynyń altyn ýaqyty aýysyp mingen poıyzdy kútýmen ketedi. – El bolǵan soń ońtústik ob­lys­tarda bireýdiń baýyry, balasy, bireý­diń quda-jekjaty bar. Jaq­sy­­lyq-jamandyqta aralaspaı, barys-kelis jasamaı turmaımyz. Sonda joldyń uzaqtyǵynyń ústine poıyzǵa aýysyp miný, kútý sııaqty jol qıyn­­dyq­tary sharshatady,–deıdi Qosta­naı qala­synyń turǵy­ny Bekqul Sadyqov. Elimizdiń ońtústigindegi oblys­tar­dan Qostanaı qalasy men oblys aýdandarynda ońtústikten kelip ju­mysqa ornalasyp neme­se orta jáne shaǵyn bıznespen aına­lysyp, bala-shaǵasyn asyrap júrgen aza­mat­tar az emes. Onyń syrtynda О́zbek­stannan oblysqa qonys aý­dar­ǵan oralman­dardyń da týyp-ós­ken jerinde aǵa­ıyn­dary qalǵan. Ońtústik oblystarǵa tikeleı po­ıyz­­dyń joqtyǵy jol qıyndyǵyn eselep jiberedi. – Ońtústik Qazaqstan obly­syn­daǵy aýylyma ýaqytynda jetip bara almaǵan­dyqtan, anam qaıtqan­da bir ýys topyraq ta sala alma­dym, – deı­di taǵy bir qosta­naılyq azamat. – Po­ıyzǵa Qostanaıdan otyryp, Shym­kentten túskenimde aýdanǵa da tezirek jeter edim. Eki poıyzǵa aýy­syp minip júrgenimde ýaqyttyń bári ótip ketti. Mine, osyndaı áńgimeni Qosta­naıda jıi estýge bolady. Turǵyn­dardyń ótinishinen keıin 2007 jy­ly Qostanaı-Saryaǵash baǵy­tyn­daǵy jolaýshylar poıyzy júre­tindigi týraly jergilikti gazetterde habarlan­dyrylǵan bolatyn. Biraq jurttyń qýanyshy kópke uzaǵan joq, osy ýádeniń sońy sıyr­qu­­ıym­shaqtanyp, tek qańqý sóz sııaqty bol­dy da qaldy. Jaqynda oblystaǵy oń­tús­tik­tik úsh myń azamattyń atynan Premer-Mı­nıstr Kárim Másimovke jol­dan­­ǵan óti­nishke “Qazaqstan temir joly” UK” ak­sıo­nerlik qoǵamynan jaýap kelgen bolatyn. Onda tirkeme jáne jolda toqta­maı, tikeleı qatyna­ıtyn vagondar áleýmettik baǵyttar qatary­na kirmegen­dikten, olarǵa respýblı­kalyq bıýdjetten sýbsı­dııa bólinbeı­tindigi aıtylǵan. Son­daı-aq onda “Jolaý­shylar tasyma­ly” AQ-tyń Qosta­naı-Saryaǵash baǵyty boıyn­sha tikeleı qatynaı­tyn vagon­dar taǵaıyndaýǵa múmkin­digi joq ekeni aıtylǵan, óıtkeni bul kásiporyn úshin shyǵyndy is bolyp tabylady. – Qostanaıdan ońtústik jaqqa qaraı bir-eki vagon tirkeý sondaı bir sheshimi tabylmaıtyn, múmkin­digi joq másele emes sekildi. My­saly, Qostanaıdan júretin “Qara­ǵandy-Qostanaı” poıyzy Astanaǵa tańǵy 4 saǵat 40 mınótte keledi. Al Astana-Saryaǵash poıyzy saǵat 6-da júredi. Qostanaıdan kelgen poıyzdyń vagonyn osyǵan tirkeı salý qanshalyqty qıyn sharýa emes, –deıdi qostanaılyq Bekqul Sadyqov. “Jolaýshylar tasymaly” AQ basshy­lyǵy jaýabynda “Jolaý­shylar poıyz­darynyń quramyna Qostanaı-Qaraǵandy, Qostanaı-Al­maty jáne Kókshetaý-Qyzyl­orda baǵyt­tary boıynsha vagondar jolaý­shylar aǵyny kóbeıgen jaǵdaıda parktegi múmkindikke qaraı eskerile­tindigin aıtqan. Ol múmkindiktiń qashan bolaryn kim bilsin, al qosta­naı­lyqtar ońtústik óńirge qaraı jol­ǵa shyqqan saıyn saǵynyp baryp, sarylyp qaıtady. Názıra JÁRIMBETOVA,Qostanaı oblysy.