Osydan bir kún buryn aýdan ákimi Marat Mýrzıev jergilikti turǵyndardyń narazylyǵyn týdyrǵan Qıǵash ózeni boıyna ornatylǵan shekara belgileri alynyp tastalǵanyn aıtty.
«Buǵan deıin 13 jáne 16 sáýir kúnderi jergilikti turǵyndarǵa túsindirý jumystary júrgizildi. Qazir maldy sýarý jáne egin sýarý úshin ózenge barý múmkindigi qarastyryldy. Buǵan eshqandaı kedergi joq», dedi aýdan ákimi.
Jergilikti halyqtyń dúrligýi 14 sáýirde Kóptoǵaı aýyly tusynda Qazaqstan men Reseı shekarasynda jańa shekaralyq qorshaý salýdan bastaldy.
«Buǵan deıin shekaralyq qorshaý Qıǵash ózeniniń salasy «Otyz bes» dep atalatyn ózektiń arǵy tusynda bolatyn. Bul ózek aýylǵa jaqyn ornalasqan. Endi kelip ol qorshaýdy ózektiń bergi jaǵyna shyǵaryp, aýyldyń irgesinen bir shyǵardy. Aýyl tek malmen kúneltedi. Aýyz sý saǵatpen beriledi. Biz sol ózektiń sýyn aýyz sý retinde de, malǵa da paıdalanatynbyz. Bul shekaralyq belgini nege jyljytty. Soǵan túsinbeı dalmyz. Nege bizge aldyn ala aıtpaıdy. Biz endi qalaı kúneltemiz, aýyz sýdy qaıdan tasımyz, mal qaıdan sý ishedi? Malǵa da senim joq, shekaradan ótip ketse, shekarany buzý bolyp tabyla ma?», deıdi Kóptoǵaı aýylynyń turǵyndary.
Joǵaryda atalǵan jaıtqa qatysty UQK shekara qyzmeti málimdeme jasady. Olar 2013 jyldyń mamyr aıynda eki shekara belgisi arasyna ornatylǵan qorshaýlar Reseı Federasııasynyń aýmaǵyna 10-70 metrge enip ketkenin, osyǵan baılanysty Kóptoǵaı aýylynda ınjenerlik jumystar júrgizilgenin aıtty.
