QYZYLAǴAShTYQ BALALAR “BALDÁÝRENDE” DEMALDY

Qazaqstan “Arteginiń” besinshi aýysymy “Dostyq aralyndaǵy kezdesý” degen atpen ótti. Res­pýb­lıkalyq “Baldáýren” oqý-saýyq­tyrý ortalyǵynyń ujymy bul joly sý tasqynynan zardap shek­ken Almaty oblysyndaǵy 150 oqý­shyǵa ystyq qushaǵyn aıqara ashty. – “Sálem, “Baldáýren!” degen dástúrli sharamen bastalǵan aýysymnyń ár kúni qyzyqty ótti, – deıdi Qyzylaǵash aýylynan kelgen Málıka Tushparova. Biz jas erek­sheligine qaraı úsh topqa bólinip, ártúrli jarystarǵa, múdde­ler boıyn­­sha úıirmelerge, toǵyz taqy­rypty qamtıtyn shyǵarma­shylyq baıqaýlarǵa qatystyq. Meniń jańa dostarym Sáýle Kez­dekbaeva, Bir­lik Nursaǵym, Mádına Ahmadıeva, Jansaıa Tólekova, Bekjan Qoja­han­dar óte ónerli ári baýyrmal bala­lar eken. “Baldáýrenniń” bazarlyǵy men syı-saýǵasy mol ekendigin jaqsy bilemiz. Munda eshkim nazardan tys qalmaıdy. Sondaı-aq, balalardyń júzin jadyratý maqsatymen elordamyzdaǵy “Motıv-Astana” JShS menedjeri Murat Salıhov syılyqtaryn arqalap kelgenine, Kókshetaýdaǵy Aqan seri atyndaǵy mádenıet kolledjiniń ónerpazdary arnaıy konsert bergenine myń rahmet aıtyldy. Aqsý aýdandyq bilim bóliminiń bas mamany G.Omarovany áńgimege tartqanymyzda, ol balalarmen birge kelgen pedagog-uıymdas­tyrý­shylardyń, psıhologtardyń, medı­sı­na qyzmetkerleriniń de mol áser­­ge bólengenin aıtty. “Bal­dáý­ren­de” psıhologııalyq jáne sport­tyq-saýyqtyrý sharalary jo­ǵary deńgeıde uıymda­styrylǵan. Saıa­hattyń ózi birneshe baǵytta júr­giziletinine tánti boldyq. Ásirese, Býrabaıdyń kýrortty aımaǵyndaǵy tálimdik kezdesýler umytylmaıdy. Biz bul jóninde Muhıtdın Tólep­baev aǵamyz basqaratyn ujymnyń atyna joldaǵan alǵys hatymyzda keńinen jazdyq, dedi ol. Memlekettiń, búkil halqy­myzdyń kómegimen Qyzylaǵashtyń eńsesi kóz aldymyzda kóterilip, kór­kem eldi mekenge aınalyp kele­di. Onda balalardyń bal kúlkisi eshqashan tolastamaıtyny anyq. Baqbergen AMALBEK, Aqmola oblysy.