Mınıstrdiń aıtýynsha, kontrrettegish uzyndyǵy 31 shaqyrym qorǵanys bógetin qamtıdy jáne 450 mln tekshe metrge deıingi kólemdegi tasqyn sýdy ýaqytsha ustaı alady. Qazirgi ýaqytta onda Astana sý qoımasynan tastalǵan 56 mln.tekshe metr tasqyn sý jınaqtalǵan.
Sondaı-aq mınıstr ózen arnalaryn tazartý, qorǵanys bógetterin nyǵaıtý, apattyq jaǵdaıdaǵy gıdrotehnıkalyq qurylystardy jóndeýdiń keshendi sharalaryn oryndaý úshin qosymsha qarajat qajet ekenin atap ótti. О́z kezeginde Aleksandr Mılıýtın Parlamentte sý tasqynyna qarsy is-sharalarǵa bıýdjet qarajatyn bólý máselesin kóteretinin aıtty.
Kezdesý barysynda depýtattar Arshaly aýdanynyń Jibek Joly kentine bardy. Onda Tótenshe jaǵdaılar birinshi vıse-mınıstri Ibragım Kúlshimbaev pen vıse-mınıstr Marat Kúldikov kenttiń sý basqan ýchaskelerinde júrgizilgen is-sharalarmen tanystyrdy. Aqmola oblysynyń 52859 áskerı bólimi men TJD jeke quramy Jibek Joly kentiniń aınalasynda eki shaqyrymdyq úıindi bekitilimdi nyǵaıtý jumystaryn jalǵastyrýda. 1000-nan astam ınertti materıaly bar qaptar daıyndalyp, onyń 700-ge jýyǵy tóselgen. Qazir jaǵdaı turaqtandy. Aýlalar aýmaǵynan erigen sý sorylyp shyǵaryldy.
Sondaı-aq Tótenshe jaǵdaılar birinshi vıse-mınıstri Ibragım Kúlshimbaev Májilis depýtattarymen birge sý tasqyny jaǵdaıyn aerovızýaldy zertteý jáne monıtorıngileý maqsatynda elorda mańyndaǵy qaýipti aýmaqtardy áýeden sholyp shyqty. Ushý barysynda depýtattar 42-razezd, Qoıandy, Talapker, Qaraótkel, Qarajar, Jibek Joly jáne Qosshy eldi mekenderiniń aýmaqtaryn áýeden baqylady.
Baqylaý kezinde qardyń erý prosesi birqalypty júrip jatqany baıqaldy. Sý shaıǵan aımaqtar joq.
Qazir táýlik boıy kosmomonıtorıng júrgizý jalǵasýda. Aqmola, Qostanaı jáne Soltústik Qazaqstan oblystarynyń keıbir ózen aýmaqtarynda seń júrý úderisi bastaldy. Osyǵan oraı, atalǵan óńirler men Shyǵys Qazaqstan oblysynyń sý qoımalarynda sý jınaýǵa qajetti oryndar ázirlenýde.
