QAZA BOLǴANDARDYŃ QYRQY BERILDI

О́tken senbi kúni Qyzylaǵash aýylynda tasqyn saldarynan qaza bolǵandardyń qyrqy berildi. Marqumdardyń rýhyna baǵyshta­lyp atqarylǵan bul rásim oblys ákimi Serik Úmbetovtiń muryndyq bolýymen, aýdan, aýyl ákimderiniń atsalysýymen ótkizildi. Ashyq aspan astyna eki qatar etip jaıylǵan keń dastarqannyń basyna jaıǵasqan jurtshylyqtyń aldynda eń aldymen Aqsý aýdan­dyq aqsaqaldar alqasynyń tóraǵa­sy Nurbek Sársenbaıuly sóz alyp, qaza tapqandardyń qyryq kúndik názirine oraı aǵaıynǵa arnaý sóz aıtty. “Tabıǵat apaty saldarynan qaıǵyly oqıǵa oryn alǵanymen tir­shilik toqtap qalmaq emes. “Ornyn­da bar ońalar” degendeı, el es jıyp, jaǵdaı birte-birte qalypqa túsip keledi. Zardap shekkenderge bar­lyq jaǵdaıdy jasap otyrǵan respýblıka oblys pen aýdan basshy­laryna da rahmet. Jaqyn kúnderdiń birinde alǵashqy turǵyn úıler de paıda­lanýǵa berilmek. Sondyqtan ólige ıman, tirige bereke-birlik tile­ıik” degen qarııanyń basalqaly só­zin jınalǵandar biraýyzdan quptady. –Qyzylaǵashtaǵy sııaqty tabıǵat­tyń tosyn apattaryn aýyz­dyqtaı almaı qalatyn kezderimiz bolady. Mundaı apattar búginde Qytaıda alapat jer silkinisi retin­de oryn alsa, Islandııada janartaý túrinde atqylaýda. Taǵy bir jerde ushaqtar qulap jatyr. Endigi jerde ondaı apattar qaıtalanbasyn dep tileıik, – dep bastady sózin oblys basshysy Serik Úmbetov. – “Tór­teý túgel bolsa, tóbedegi keledi, altaý ala bolsa, aýyzdaǵy ketedi” degen­deı, eń bastysy, elimizdi aýyz­birlik pen yntymaqtan ajyratpasyn, el ishi aman bolsyn dep tileıik. Aýyz­birliginen ajyrap qalǵan qyrǵyz aǵaıyndar ne bolyp jatyr búginde? Yntymaǵymyz bol­sa, bári qalpyna keledi. Qaza bol­ǵan jaqyndary­myzdyń jany jánnatta bolsyn. Endi biraz kúnde 40 shaqty tur­ǵyn úıdiń paıdalanýǵa berilip, Egin­sý men Aqtoǵandaǵy qalpyna keltirý jumystarynyń qarqyn alatyndyǵyn aıtqan oblys ákimi zardap shekkenderge qajetti barlyq kómektiń kórsetilip jatqandyǵyn, basqa da tıisti sharýalardyń at­qary­latyndyǵyn taǵy bir atap ótti. Qazaqstan musylmandary dinı basqarmasynyń Taldyqorǵan óńirindegi ókil-ımamy Jumanáli Amanov qaza bolǵandardyń rýhyna baǵyshtap quran oqyǵannan keıin oblystyq ardagerler keńesiniń tóraǵasy Egeýbek Dalbaǵaev sóz alyp, qaza bolǵandardyń otbasy­lary men týǵan-týystaryn sabyrǵa shaqyrdy. Bul jaıyndaǵy áńgimeni Qazaq radıosy dırektorynyń oryn­basary, qalamger Kó­pen Ámir­bek jalǵastyryp, halqy­myzdyń torqaly toı men topyraq­ty ólimdi birigip atqaratyn ıgi dás­túri jaıynda sóz qozǵady. Qyryq kúndik asty ótkizý bary­synda aýyl turǵyndary da sóılep, qıyndyqta jalǵyz qaldyr­maı, barlyq kómekti jasap jatqan respýblıka jurtshylyǵyna, oblys basshylyǵyna degen shynaıy alǵystaryn bildirdi. Kúmisjan BAIJAN,  Almaty oblysy.