Aımaqtar • 20 Sáýir, 2021

Shymkentte karantın talaptary kúsheıtildi

Shymkentte karantındik shekteý sharalary 20 sáýirden bastap taǵy da jalǵasady, dep habarlaıdy Egemen.kz.

Bul týraly Shymkent qalasynyń Bas memlekettik sanıtarııalyq dárigeriniń jańa qaýlysynda aıtyldy.

«Shymkent qalasynda karantın rejımi uzartylsyn jáne koronavırýstyq ınfeksııanyń taralýynyń aldyn alý jónindegi shekteý sharalary 2021 jylǵy 20 sáýirden bastap epıdemıologııalyq jaǵdaı turaqtalǵanǵa deıin kúsheıtilsin» dep bekitilgen.

Qazirgi tańda Shymkent qalasy «qyzyl» aımaqta. Jańa qaýlyǵa sáıkes, adamdardyń kóp jınalýyna baılanysty kez kelgen (aýyzashar, eske alý, týǵan kúnder, mereı toılar, shyǵaryp salý, qudalyq toı, betashar jáne basqa) sharalardy ótkizýge tyıym salyndy. 65 jastan asqan adamdardyń qalada júrýi shekteldi. Saýda ortalyqtarynda, azyq-túlik jáne azyq-túlik emes dúkenderde, halyqqa qyzmet kórsetý salasyndaǵy nysandarda jáne adamdar kóp jınalýǵa múmkindigi bar oryndarda kúndelikti dezınfeksııalyq is-sharalar júrgizilýi tıis. Banket zaldardyń, mektep ashanalarynyń jumysyna tyıym salyndy. Avtovokzaldar men avtostansııalardyń jumysy toqtatylady.

Adamdardyń aıaldamalarda jáne qoǵamdyq kólikterde shoǵyrlanýyn boldyrmaý maqsatynda jelide kólik quraldarynyń (avtobýstardyń, shaǵyn avtobýstardyń) sany kóbeıtiledi, qalǵan ýaqytta qozǵalystyń birkelki kestesi uıymdastyrylady. Barlyq nysandarda, onyń ishinde qoǵamdyq kólikte, taksıde sanıtarııalyq-profılaktıkalyq, sanıtarııalyq-epıdemııaǵa qarsy jáne dezınfeksııalyq is-sharalardy júrgizý qamtamasyz etiledi. Shymkent qalasyna vaksınany jetkizýdiń josparlanǵan kólemin eskere otyryp KVI-ǵa qarsy vaksınasııalaý jumystary jalǵasady. Osy qaýly 2021 jylǵy 20 sáýirden bastap kúshine enedi.

Bul rette, búgin QR Premer-Mınıstriniń tóraǵalyǵymen onlaın rejımde ótken Úkimet otyrysynda qala ákimi Murat Áıtenov sanıtarlyq-epıdemıologııalyq jaǵdaı boıynsha baıandama jasady. Murat Dúısenbekuly kovıdtiń yqtımal tolqynyna úsh ssenarıı boıynsha daıyndyq júrgizilgenin atap ótti.

«Búginde qala A ssenarıımen jumys istep jatyr. Jalpy qala V jáne S ssenarııge 100 paıyz tolyq daıyndaldy. A – aǵymdaǵy jaǵdaı 1 290 tósek-oryndy qamtıdy. V – maýsymdyq epıdemıologııalyq jaǵdaı nasharlasa, tósek-oryn sany 4 016-ǵa deıin artady. S – epıdemıologııalyq daǵdarys oryn alsa, 5 416 tósek-oryn ashylady. Qala turǵyndaryna qyzmet kórsetetin 11 PTR zerthanasy jumys isteýde. Zerthanalarda 1 kúnde 6 200 test jasaýǵa múmkindik bar. Barlyǵy 349 518 PTR test ótkizildi. 19 sáýirde 1 312 PTR test jasalǵan. Azamattardy vaksınasııalaý úshin 38 beket uıymdastyrylyp, búginde 1-shi komponent 67 906, 2-shi komponent 6 918 azamatqa salyndy. Vaksınasııalaýǵa 753 medısına qyzmetkeri oqytylyp, jumyldyryldy», dedi Murat Dúısenbekuly.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz