Foto: Elıa Býlatovna/facebook.com
Apat týraly Facebook-tegi «Qalalyq kezekshi» tobynda jazylǵan.
«Naýryzbaı aýdanynyń ákimdigi aýyz sý máselesi jaıly únemi bos ýáde berip keldi. Aqyry aýdan turǵyndary bul máseleni óz kúshterimen retteýge kiristi. Biz arnaıy tehnıka jaldadyq. Eń ókinishtisi, jumys barysynda qaıǵyly oqıǵa bolyp, 20 sáýirde qubyr tartyp jatqan jumysshy qaıtys boldy. Osylaısha, jurtty sýmen qamtymaq bolǵan mamannan aıyrylyp qaldyq. Endi adam ólimine kim jaýap beredi? Ákimdiktiń atqarýy kerek jumysty oryndaý kezinde ákesi qaıtys bolǵanyn balalaryna qalaı túsindirýge bolady?», dep jazdy Facebook-te almatylyq turǵyn.
Bul oqıǵaǵa baılanysty Almaty polısııa departamenti túsinikteme berdi.
«Adam ólimi faktisin Naýryzbaı aýdandyq polısııa basqarmasy sotqa deıingi tergeýdiń biryńǵaı tizimine tirkedi. Sot-medısınalyq saraptama taǵaıyndaldy. Oqıǵanyń basqa da mán-jaıy anyqtalýda», dedi polısııa departamentiniń ókili.
