Jobaǵa úsh memlekettiń qatysy bar. Startapty belorýsııalyq IT-mamandar daıyndap, jobanyń ózi Estonııada tirkelip, biraq jumysyn Qazaqstanda bastamaq. Startaptyń maqsaty – fermerler men qala turǵyndaryn bir platformada toǵystyryp, deldal jáne alypsatarlardy aralastyrmaı, taza tabıǵı ónimdi tutynýshyǵa tikeleı jetkizip berý.
– Qazir ekoónimderge degen suranys óte joǵary. Bizdiń basty ereksheligimiz – eki tarapqa da qolaılymyz. Bıznes turǵysynan qaraıtyn bolsaq, fermerlerdi artyq problemadan aryltamyz. О́nimdi tutynýshyǵa ózimiz jetkizemiz. Al klıentterdiń hımııa qosylmaǵan, taza, tabıǵı ónimderdi tańdap alýyna múmkindik syılaımyz. Organıkalyq ónimderdiń álemdik naryǵy 20 jylda 6 ese ósti jáne quny 106 mlrd dollardan asyp ketti. Jeke bıznes daıyndaǵan organıkalyq ónimder marketpleısi 2021 jyly eń tez kóterilgen bızneske aınalýda, – deıdi ıdeıa avtory Baht Nııazov.
Startap aıasynda sharýa qojalyqtary, shaǵyn kásipkerlik ónimderi «sıfrlanyp», qolóner sheberleriniń ónimderi de naryqqa shyǵarylmaq. Jobaǵa qatysý úshin óndirýshiler sapaly, taza, tabıǵı ónim shyǵaryp, ónimniń ekologııalyq tazalyǵyn qamtamasyz etýi kerek. Joba uıymdastyrýshylarynyń aıtýynsha, qazirdiń ózinde platformaǵa onshaqty bıznesmen qosylǵan. Bazada Almaty oblysyndaǵy syr, sút ónimderin, jemis-jıdek, halal et, qus etin óndirýshiler bar. Fıtnes-ónimder de barshylyq. Qosymshaǵa kartany tirkep, ónimge tapsyrys berýge bolady. Avtorlar keleshekte jobanyń aýdıtorııasy men tapsyrys geografııasyn arttyramyz deıdi.
– Biz turaqty damý prınsıpterine negizdelgen kez kelgen bıznesti qoldaýǵa daıynbyz. Biraq bizdiń basty nazarymyz shaǵyn (20 adamǵa deıin) organıkalyq jáne tabıǵı ónimder óndirýshiler men satýshylar, dámhanalar, meıramhanalar, slow food jáne eko-otelder. Qazirgi tańda Qazaqstanda, Almaty qalasynda jumys istep jatyrmyz. Sondaı-aq AQSh pen Estonııada keńsemiz bar. Jaqyn ýaqytta Reseı jáne Eýropa naryǵyna shyǵýdy josparlap otyrmyz, – deıdi joba avtorlary.
