ASTANA TV telearnasynyń málimetinshe, er adam qujattardyń sýretin áleýmettik jelilerden tapqan, ǵalamtordaǵy qujaty joǵalǵan adamdardyń habarlamalaryn kórip, qujat sýretterin ózine saqtap alyp otyrǵan. Biraz ýaqyttan keıin jábirlenýshiler atynda nesıesi bar ekenin jáne tólemdi keshiktirgeni týraly bankten habarlasqandyǵyn aıtqan.
«Men nesıege jıhaz alǵym kelgen, alaıda bank ótinishimdi qanaǵattandyrmady. Nesıe tarıhymnyń jaqsy ekenin biletinmin, al bank menedjeri meniń atymda tólenbegen nesıe baryn aıtty. Ony ózim de tekserip kórdim, rasymen de keshiktirilgen nesıem bar eken. Biraq men ony alǵan joqpyn», dedi Petropavl qalasynyń Saıat esimdi turǵyny.
Alaıaqtyq jasaǵan kúdikti er adam ustaldy, qazir tergeý amaldary júrip jatyr.
«Tabylǵan jeke kýálikterdi Halyqqa qyzmet kórsetý ortalyǵyna ákelý qajet. Biz olardy derekter bazasyna engizemiz jáne joıamyz, qujat sol sátten bastap jaramsyz bolyp tabylady», dedi SQO polısııa departamenti kóshi-qon qyzmeti basqarmasynyń aǵa ınspektory Dınara Aıtqojına.
