«Densaýlyq saqtaý salasynda kóptegen máseleler bar, olarǵa nazar aýdarý qajet. Salanyń birqatar mańyzdy kórsetkishteri tómendedi. Bul eń aldymen ana ólimine qatysty. Sondaı-aq júrek-qantamyr júıesi aýrýlarynan bolatyn ólim-jitimniń 15 paıyzǵa óskeni baıqaldy. Munyń bári koronavırýstyq ınfeksııanyń pandemııasymen baılanysty», dedi mınıstr.
Mınıstrdiń aıtýynsha, osy problemalardy sheshý úshin buryn-sońdy bolmaǵan sharalar qabyldandy.
«Qazirgi ýaqytta densaýlyq saqtaý júıesi úshin negizgi basymdyq alǵashqy medısınalyq-sanıtarııalyq kómektiń qoljetimdiligi men sapasyn qamtamasyz etý bolyp sanalady.
Búgingi tańda halyqqa medısınalyq qyzmetterdi 7 myńnan astam ambýlatorııalyq-emhanalyq uıym kórsetedi, onyń ishinde memlekettik 59%, jeke menshik - 41%. Ýchaskelik dárigerdiń júktemesin azaıtý úshin biz 2020 jyly qosymsha jalpy praktıka dárigerleriniń 480 ýchaskesin ashtyq. Medısınalyq kómektiń qoljetimdiligin qamtamasyz etý maqsatynda el óńirlerinde 63 ambýlatorııalyq-emhanalyq nysan salynyp, paıdalanýǵa berildi. Medısınalyq-sanıtarııalyq alǵashqy kómekti qarjylandyrý ótken jyly densaýlyq saqtaýdy qarjylandyrýdyń jalpy kóleminiń 52,4%-yna deıin jetkizildi. Bul rette, dárilik zattarǵa jazyp berilgen jeńildikti reseptiler sany 13,7 mıllıonǵa jetti», dedi A. Soı.
Sondaı-aq el halqy skrınıngtik zertteýlermen qamtamasyz etilgen, olardyń sany 2020 jyly 12 mln zerttep-qaraýdy qurady. Nátıjesinde, 600 myńnan astam aýrý anyqtaldy.
«Qant dıabeti, gıpertonııa jáne júrek fýnksııasynyń sozylmaly jetkiliksizdigi boıynsha aýrýlarǵa qatysty baǵdarlamany iske asyrý jalǵasýda. 2020 jyly dınamıkalyq baqylaýdaǵy pasıentterdiń 55 paıyzy osy baǵdarlamaǵa qatysty. Biz mobıldik medısınany belsendi engizýdemiz. Úıde medısınalyq kómek kórsetý úshin mobıldik brıgadalardyń sany 3 myń 700-ge jetti, onyń 49 paıyzy aýylda. Bul rette, 2020 jyly olar 750 myńnan astam medısınalyq qyzmet kórsetti. Bul úıde KVI bar naýqastarǵa medısınalyq kómek kórsetýde mańyzdy ról atqardy», dedi mınıstr.
