«Bizdiń elderimiz daǵdarystan keıingi qalpyna kelý kezeńine birtindep kóship jatyr. Elderimiz júzege asyryp jatqan jappaı vaksınalaý qarqynyn dáıekti túrde arttyrý qysqa merzimdi perspektıvada EAEO-nyń qazirgi daǵdarystan shyǵýy týraly aıtýǵa múmkindik beredi», dedi A.Mamın.
Úkimet basshysy Eýrazııalyq ekonomıkalyq odaq elderi arasyndaǵy ózara saýda kórsetkishteriniń jaqsarǵanyn, óndiristik saladaǵy ósimniń qalpyna kelýin jáne qyzmet kórsetý sektoryndaǵy iskerlik belsendiliktiń artqanyn atap ótti. Bıylǵy qańtar-aqpan aılarynda EAEO-nyń ózara saýdasy $9 mlrd qurady, bul ótken jyldyń sáıkes kezeńimen salystyrǵanda 6,8%-ǵa artyq.
Premer-Mınıstr ortaq óndiristik júıelerdi qalyptastyrý qarqynyn edáýir jedeldetý, ónerkásiptik kooperasııany, EAEO-nyń qaıta óńdeý áleýetin arttyrý jáne shoǵyrlandyrý qajettigin atap ótti.
«Bizdiń elderimiz elektromobılderge arnalǵan batareıalardy, sırek kezdesetin metaldardy, «jańa materıaldardy», qosylǵan quny joǵary AО́K ónimderin jáne t. b. qosa alǵanda, ónimder men qyzmetterdiń barlyq derlik strategııalyq mańyzdy túrleri boıynsha óndiristerdi qalyptastyrýda kúsheıip kele jatqan básekelestikke qosylý turǵysynan adamı da, resýrstyq ta áleýetke ıe», dedi A. Mamın.
Qazaqstan Úkimetiniń basshysy ónerkásiptik kooperasııa jobalaryn, onyń ishinde memlekettik jáne kvazımemlekettik qarajattyń qatysýymen qarjylandyrýdyń qosymsha kózderin qalyptastyrýdyń mańyzdylyǵyn atap ótti. Bıyl 28 sáýirde qol qoıylǵan Qazaqstan, Reseı jáne Birikken Arab Ámirlikteriniń tikeleı ınvestısııalar qorlary arasyndaǵy teń ınvestısııalaý týraly kelisimdi mysal retinde keltirdi.
Premer-Mınıstr taýarlar men qyzmetterdiń ózara saýdasyna jasandy kedergiler jasaýǵa jol bermeý, shekaralardan ótý rásimderiniń tıimdiligin arttyrý, monıtorıng jáne baqylaý júıeleriniń derekterimen almasý jumysyn kúsheıtýge shaqyrdy.
EAEO aıasynda ınfraqurylymnyń sapasy men qoljetimdiligin arttyrý jumysyn jalǵastyrýdyń mańyzdylyǵy atap ótildi. Úkimet basshysy qalyptasqan baǵyttardyń senimdiligine jáne jekelegen óńirlerdiń tranzıttik áleýetine qatysty belgisizdikke baılanysty alańdaýshylyqtyń ósýine oraı halyqaralyq kólik aǵyndaryn aýqymdy qaıta bólýdi eskere otyryp, EAEO-nyń halyqaralyq tasymaldaý naryǵyndaǵy óz úlesin ulǵaıtýǵa jáne buǵan deıin qoljetimsiz bolǵan syrtqy óndiristik tizbekterge qosylýǵa múmkindigi bar ekenin atap ótti.
«Atalǵan qarqyn bizdiń tranzıttik kórsetkishterimiz arqyly kórinis berýde. 2020 jyly pandemııaǵa qaramastan, EAEO aýmaǵy arqyly Qytaı-Eýropa-Qytaı baǵyty boıynsha konteınerlik tasymaldardyń ósýi 64%-dy (511,8 myń JFE) qurady. Osy jyldyń alǵashqy úsh aıynda ósim 133%-dy (147 myń DEF) qurady», dedi A.Mamın.
Otyrys barysynda ónerkásiptik yntymaqtastyqtyń 2025 jylǵa deıingi negizgi baǵyttary bekitildi. Qujat ortaq naryqtyń áleýeti negizinde EAEO-ǵa múshe memleketterdiń ónerkásiptik óndirisiniń ozyq ósýin yntalandyrýǵa, EAEO-ǵa múshe memleketterdiń ónerkásiptik kásiporyndarynyń básekege qabilettiligin arttyrýǵa, birlesip óndirilgen taýarlardyń syrtqy naryqtarda eksportyn ilgeriletýge, ınnovasııalardy jáne ónerkásiptiń sıfrlyq transformasııasyn birlesip yntalandyrý jolymen ónerkásiptik óndiristi tehnologııalyq damytýdyń jańa deńgeıine ótýge baǵyttalǵan.
Jerdi qashyqtan zondtaýdyń ıntegrasııalanǵan ǵarysh júıesin qalyptastyrý, ózara saýdadaǵy kedergilerdi odan ári joıý, úshinshi eldermen elektrondyq saýdany retteý tártibi, EAEO aýyl sharýashylyǵy ónimderiniń naryǵyn ósimdikterdiń qaýipti vırýstarynyń taralýynan qorǵaý máseleleri jáne basqa da máseleler qaraldy.
Eýrazııalyq ekonomıkalyq komıssııa men О́zbekstan Úkimeti ózara is-qımyl týraly memorandýmǵa jáne ony iske asyrý jónindegi is-sharalar josparyna qol qoıdy.
Sondaı-aq otyrysqa Armenııa Premer-Mınıstriniń mindetin atqarýshy Nıkol Pashınıan, Belarýs Úkimetiniń basshysy Roman Golovchenko, Qyrǵyzstan Úkimetiniń basshysy Ýlýkbek Marıpov, Reseı Úkimetiniń basshysy Mıhaıl Mıshýstın, Tájikstan Úkimetiniń basshysy Kohır Rasýlzoda, О́zbekstan Úkimetiniń basshysy Abdýlla Arıpov, Moldova Premer-Mınıstriniń mindetin atqarýshy Aýrelıı Chokoı (onlaın-rejımde), Túrikmenstan Mınıstrler kabıneti tóraǵasynyń orynbasary Serdar Berdymýhamedov qatysty. Kýba Premer-Mınıstri Krýs Manýel Marrero beıne málimdeme jasady.
