«Búgin otandyq aqparat salasynda taǵy bir úlken jańalyq oryn alyp otyr. Elimizdiń eń basty basylymdary – «Egemen Qazaqstan» men «Kazahstanskaıa pravda» gazetteri biriktirilip, derbes «Egemen Qazaqstan» aksıonerlik qoǵam retinde quryldy. Onyń Basqarma tóraǵasy laýazymyna – elimizge belgili zııaly azamat Darhan Qýandyquly Qydyrálini taǵaıyndadym.
О́tken ǵasyrdyń basynda bir-birine qanattasa, birinen soń bir jaryq kórgen júz jyldyq jylnamasy bar qos gazet –halyqqa aqpar jetkizýde ózderine júktelgen mindetti abyroımen atqara bildi. Dese de, búgingideı aqparattyq tehnologııa qaryshtap damyǵan ınternet dáýirinde dástúrli baspasózdi zaman kóshine saı jańǵyrtyp otyrý – ýaqyt talaby. Sondyqtan Úkimettiń Qaýlysymen qabyldanǵan bul ózgeris otandyq medıanyń damý baǵytyndaǵy kezekti mańyzdy qadam dep sanaımyn.
Árıne, eki gazetti biriktirý – onyń bireýi óz jumysyn toqtatady degendi bildirmeıdi. «Kazahstankaıa pravda» gazeti óziniń qalyptasqan brendtik ataýyn saqtaıdy. Basylymdy memlekettik aqparat tapsyrysy aıasynda qarjylyq qoldaý jalǵasady. Eń bastysy bul jýrnalısterdiń shyǵarmashylyǵyna eshqandaı kedergisin keltirmeıdi.
Qaıta bir ortalyqqa birikken qos basylymnyń eldi aqparattyq-ıdeologııalyq turǵydan qamtý aıasy birizdenip, oqyrman aldyndaǵy tartymdylyǵy men sapaly kontent usyný áleýeti odan ary artady dep oılaımyn. Biriktirý barysynda tek ákimshilik-sharýashylyq resýrstar qysqarady. Birinshi kezekte árıne qarjy únemdeledi. Bul óz kezeginde, shyǵarmashylyq ujymnyń tabysyn arttyryp, sapalyq quramyn kúsheıtýge tyń múmkindik bolmaq. Eń bastysy, respýblıkalyq bas basylymdardyń mazmun-kontenti jańa sapaǵa kóterilip, básekege qabileti kúsheıe túsedi dep sanaımyn», dep jazdy mınıstr Aıda Balaeva.
