Senat qabyrǵasynda qabyldanǵan zańdar men Parlamenttik tyńdaýlar týraly jýrnalısterge aıtyp berdi. Ulttyq qundylyqtar máselesiniń de basty nazarda ekenin jetkizdi.
Senator Nurtóre Júsip: «Senat qabyrǵasynda ulttyq qundylyqtardy ulyqtaıtyn Parlamenttik tyńdaý ótti. Qazaq qoǵamynyń negizgi uıytqysy ulttyq tárbıe, qazaqy qalybymyzdy saqtaý, jahandaný jaǵdaıynda tilimizdiń qoldanys aıasyn keńitý, dinimiz, mádenıetimiz, ádebıetimiz sekildi ózekti máselelerdiń barlyǵy talqylanady. Sonyń ishinde Memleket basshysy Qasym-Jomart Toqaev kótergen máselege de erekshe kóńil bólindi. Qoǵamdaǵy ózekti máseleniń biri Memlekettik til týraly zań jobasyn jasaý jóninde nusqaý berildi.
Qazir dástúrli buqaralyq aqparat quraldary ulttyq qundylyqtardy ulyqtaýdyń uıasy bolyp tur. Qazaq tili, dili, mádenıeti, ádebıeti, tarıhy, búgini men erteńine qatysty máseleniń barlyǵyna respýblıkalyq, aýdandyq gazetterge deıin shyryldap, janashyrlyqpen másele kóteredi. Sonyń ishinde birneshe basylymdy baýyryna basyp otyrǵan «Qazaq gazetteri» JShS-nyń ulttyq qundylyqtardy ulyqtaýdaǵy róli zor. Qoǵamda kún tártibinen túspeı kele jatqan negizgi máseleniń barlyǵy ózderińizge de belgili. Aıtylyp ta, jazylyp ta, kóterilip te keledi. Parlamenttik jumys toby qazaqtildi basylymdarda ne jazylyp, qandaı ótkir másele kóterilip júrgenin, onyń ishinde sheshilmeı turǵan másele qaısysy – osynyń bárine monıtorıng jasalyp, Úkimettiń qurylymdyq bólimderine bólip-bólip, qordalanǵan máselelerdi kezeń-kezeńimen sheship otyrýy keregin de aıtqanbyz.
О́kinishke qaraı, «estıtin memleket qaǵıdasy» degenimizben, dástúrli BAQ-tyń jazǵanyna nazar aýdarylmaı tur. Pandemııa jaǵdaıynda dárigerler, muǵalimder aldyńǵy shepte. Olarǵa áleýmettik jaǵynan qanshama kómek kórsetilip, qarjylaı qoldaý berildi. Áleýmettik paket máseleleri qozǵalyp jatyr. Al jýrnalıster she? Basyn qaterge tigip, aldyńǵy shepte júrip, aqparat taratyp, indet oshaǵynda jumys istedi. Mysaly, byltyr pandemııanyń alǵashqy tolqynynda qanshama myqty jýrnalıst, qalamger azamattardan aırylyp qaldyq. Olardyń qatary sırep jatqan tusta «rýhanııattyń joqshysy kim bolady?» degen suraq oılandyrady», dep pikirin bildirdi.
Senat depýtattary Nurtóre Júsip, Lázzat Súleımen, Dınar Nóketaeva, Sultanbek Mákejanov ulttyq baspasózde kóterilip jatqan máseleniń barlyǵyna birdeı múmkindiginshe nazar aýdarylatynyna sendirdi. Ulttyq tárbıe, jer máselesi, ulttyq biregeılik pen jahandaný jaǵdaıynda til, dil tazalyǵyn saqtap qalý, ásirese balalar basylymynyń jaı-kúıi, jalpy baspasózge jazylý, basylymdardy taratý isinde kezdesip otyratyn kedergiler týraly gazet-jýrnaldardyń bas redaktorlary men senatorlar dóńgelek ústel sıpatyndaǵy otyrysta jan-jaqty talqylady.
Ulttyq qundylyqtardy sińirýdegi ulttyq baspasózdiń qarashańyraǵyna aınalyp otyrǵan ujymǵa alǵys aıtqan senatorlar toby aldaǵy ýaqytta da osyndaı keleli máselelerdi birlese talqylaýdy usyndy.
