Senat depýtaty Rysqalı Ábdikerov Qaraǵandy oblysy Ulytaý aýdandyq polısııa bólimi qyzmetkerlerimen kezdesý barysynda mal urlyǵyn aldyn alý, esirtkige qarsy kúres, zorlyq-zombylyqty boldyrmaý qajettigin atap ótti. Sonymen qatar kezdesýde medıasııa arqyly sotqa jetkizbeı tatýlastyrý, sot júıesin qalyptastyrý, polısııa qyzmetkerlerin turǵyn úımen qamtasyz etý qajet ekendigi aıtyldy. Senator sonymen qatar «Ulytaý» qoryq-murajaıyn aralady jáne bıylǵy jyly paıdalanýǵa beriletin týrıstik sapar ortalyǵynyń jumysymen tanysty. Senator aýdanda tarıhı týrızm, ekotýrızm, agrotýrızm jáne kıeli mekenderdi aralaý baǵyttaryn damytý, týrıster úshin qyzmet kórsetý sapasyn arttyrýǵa asa kónil bólý qajettigin atap ótti. R.Ábdikerov Ulytaý aýdan ákimdiginde aýdan turǵyndarymen, jurtshylyqpen jáne aktıv múshelerimen kezdesti. Júzdesýde aýyl turǵyndary kókeıde júrgen máselelerin ortaǵa saldy. Ásirese, aýyzsý men elektr energııasy, Ulytaý-Jezqazǵan baǵytyndaǵy jol qatynasy jáne sol baǵytta júretin jolaýshylar kóliginiń negizgi máseleleri talqylandy. Senat depýtaty Jezdi kentinde salynyp jatqan sport kesheniniń qurylysyn aralap kórdi.
* * *
Senator Qaırat Qojamjarov Qazaqstan Qarýly Kúshteri Aeromobıldi áskeriniń №68665 áskerı bóliminde bolyp, kazarmalyq-turǵyn úı qory, áskerı qyzmetshilerdi tamaqtandyrýdy uıymdastyrý, qarý-jaraq pen áskerı tehnıka úlgileri, sondaı-aq áskerı bólimdi materıaldyq-tehnıkalyq jabdyqtaý barysymen tanysty. Qorǵanys mınıstriniń orynbasary Rýslan Shpekbaev qatysqan jumys keńesinde Qarýly Kúshterdiń 2021-2023 jyldardaǵy qajettilikterin jetkilikti qarjylandyrý, áskerı qyzmetshilerdi áleýmettik qoldaý jáne pandemııa kezindegi áskerı qyzmetti atqarýdyń erekshelikteri talqylandy. Otyrysqa qatysýshylar sonymen qatar armııanyń jaýyngerlik ázirligi men jaýyngerlik qabiletin odan ári nyǵaıtýǵa, áskerı qyzmetshiler men olardyń otbasynyń turǵyn úı-turmystyq jaǵdaılaryn jaqsartýǵa baǵyttalǵan birqatar zańnamalyq bastamalardy talqyǵa saldy. Atap aıtqanda, áskerı polısııa, áskerı qyzmet máseleleri, arnaýly memlekettik organdardyń qyzmetkerleri men áskerı qyzmetshilerdiń turǵyn úı qatynastaryna qatysty zań jobalary qaraldy.
* * *
Senat depýtattary Nurtóre Júsip, Lázzat Súleımen, Dınar Nóketaeva, Sultanbek Mákejanov «Qazaq gazetteri» JShS ujymymen kezdesti. Seriktestikke qarasty basylymdardyń bas redaktorlarymen ótken kezdesýde baspasózdiń búgingi máselelerimen tanysty. Senat qabyrǵasynda qabyldanǵan zańdar men Parlamenttik tyńdaýlar týraly jýrnalısterge aıtyp berdi. Ulttyq qundylyqtar máselesiniń de basty nazarda ekenin jetkizdi.
Senatorlar ulttyq baspasózde kóterilip jatqan máseleniń barlyǵyna birdeı múmkindiginshe nazar aýdarylatynyna sendirdi. Ulttyq tárbıe, jer máselesi, ulttyq biregeılik pen jahandaný jaǵdaıynda til, dil tazalyǵyn saqtap qalý, ásirese balalar basylymynyń jaı-kúıi, jalpy baspasózge jazylý, basylymdardy taratý isinde kezdesip otyratyn kedergiler týraly gazet-jýrnaldardyń bas redaktorlary men senatorlar dóńgelek ústel sıpatyndaǵy otyrysta jan-jaqty talqylady.
* * *
Senator Olga Býlavkına Shyǵys Qazaqstan oblysy Borodýlıha aýdanynda boldy. Senator sapary Borodýlıha aýylyndaǵy dene shynyqtyrý-saýyqtyrý keshenin kórýden bastaldy. Depýtat qurylys barysymen tanysa kelip, elimizdegi buqaralyq jáne balalar sportyn damytýǵa joǵary deńgeıde erekshe nazar aýdarylyp otyrǵanyn atap ótti. Senator mundaı nysandardyń qurylysy buqaralyq sportty damytýǵa serpin beretinin, demek, salaýatty ómir saltyn ustanýshylar sany arta túsetinin jetkizdi.
Senatordyń dárigerlermen jáne ortalyq aýdandyq aýrýhananyń basshylarymen kezdesýinde aýdannyń densaýlyq saqtaý júıesiniń jaǵdaıy týraly aıtyldy. Qazir ınfeksııalyq stasıonarda 22, jansaqtaý bóliminde 4 oryn bolsa, 50 tósektik oryn rezervte jabdyqtalyp tur.
Olga Býlavkına aýdannyń sharýa qojalyqtarynyń basshylarymen kezdesý barysynda fermerlerdi iri qara mal basyn kóbeıtýge jáne asyl tuqymdy bazany jaqsartýǵa arnalǵan bordaqylaý alańdaryn jasaýda belsendi bolýǵa shaqyrdy.
* * *
Senator Sergeı Ershov Qaraǵandy oblysy jumys sapary barysynda «Astana» óńirlik qolbasshylyǵy basshylyǵymen jáne №31775 áskerı bólimniń áskerı qyzmetshilerimen kezdesti. Qaraǵandy qalasynda ornalasqan mehanıkalandyrylǵan brıgadada bolǵan kezde depýtat ofıserlermen jáne serjanttarmen birge áskerı bólimdegi áskerı qyzmetshilerdiń turǵyn úı jaǵdaılaryn jaqsartý jáne olardyń eńbek qatynastaryna baılanysty ózekti máselelerdi talqyǵa saldy. Sergeı Ershov sonymen qatar №36352 «Spassk» áskerı bólimindegi oqý ortalyǵynyń áskerı qyzmetshilerimen kezdesti. Áskerı qyzmetshiler kezdesý barysynda zeınetkerlikke shyqqannan keıin ıpoteka tóleýge aqshasynyń jetispeýi nemese densaýlyǵyna baılanysty shuǵyl komıssııalanǵanda sozylmaly naýqasy bar balalary bar áskerı otbasylardyń qosymsha turǵyn úı alý quqyǵynyń bolmaýy, raport jazǵan kezden bastap emes, áskerı qyzmetti bastaǵan sátten bastap turǵyn úıge kezekke qoıý, ıpoteka alǵanda banktik paıyzdyq mólsherlemelerdi tómendetý qajettigi jáne basqa máseleler týraly aıtyldy.
Qaraǵandy oblysyna sapary barysynda depýtat qazirgi ýaqytta Qazaqstan halqyn vaksınasııalaýda keńinen paıdalanylatyn Spýtnık V vaksınasy shyǵarylatyn Qaraǵandy farmasevtıka kesheniniń qyzmetkerlerimen de kezdesti.
