23 jastaǵy B.M. esimdi aıyptalýshy QR QK 99-baby 2-bóliginiń 6 jáne 9-tarmaqtary (basqa adamdardyń ómirine qaýipti tásilmen, buzaqylyq nıetpen jasalǵan kisi óltirý) boıynsha kináli dep tanylyp, tótenshe qaýipsizdik kolonııasynda jazasyn óteı otyryp, 15 jylǵa bas bostandyǵynan aıyryldy. Al 26 jastaǵy B.D. esimdi azamat 432-baby boıynsha (qylmysty jasyryp qalý) kináli dep tanylyp, 3 jylǵa túrmege toǵytyldy.
«Sottalýshy B.M. buzaqylyq nıetpen, jalpy qabyldanǵan minez-qulyq normalaryn elemeı jáne aınalasyndaǵylarǵa qurmetsizdik bildirip, qoǵamdyq tártipti óreskel buza otyryp, Sıgýatovqa 12 kalıbrli ańshylyq myltyqtan birneshe ret oq atqan», dedi sýdıa Tynyshtyq Nýrımova.
Sonymen qatar, sottalýshylar jábirlenýshi tarapqa 10 mln teńge kóleminde moraldyq shyǵyn óteýi tıis. Dese de, marqumnyń týystary úkimmen kelispeıdi. Olardyń pikirinshe, atalǵan úkim tym jumsaq.
– Sot prosesinde B.D. polısııa qyzmetkeri retinde ótken. Alaıda, úkimde Atyraý qalasynyń turǵyny retinde kórsetilgen. Muny qalaı túsinýge bolady? Ol 432-bap boıynsha eń uzaq merzimdi alýy kerek edi, ıaǵnı 6 jyl. Ekinshi sottalýshy da kem degende – 20 jyl alýy kerek edi. Áıtse de, osy bap boıynsha eń az merzim – 15 jyl. Onyń aıtýynsha, polıseı kóshe boıynan ańshy myltyǵyn taýyp alyp, bir jylǵa jýyq úıinde ustaǵan. Nelikten «atys qarýyn zańsyz saqtaý» degen taǵy bir úkim kúshine enbedi? Ulymyzdyń ómirin qıǵan adamdardy tym jeńil jaza aldy dep sanaımyz. Sondyqtan úkimge shaǵymdanatyn bolamyz», dedi marqumnyń ákesi Orazǵalı Toqsanbaı.
Esterińizge sala keteıik, atyraýlyq sport juldyzy Esenbek Sıgýatov ótken jyldyń 9 tamyzyna qaraǵan túni qala mańyndaǵy Amangeldi (Damba) jáne Qurmanǵazy aýyldarynyń jasóspirimderi men úlken jigitter arasyndaǵy qaqtyǵys kezinde qaza tapqan bolatyn. Atyraý oblystyq polısııa departamenti uzaq ýaqyt boıy eki kúdiktiniń de quqyq qorǵaý organdarynda qyzmet etkenin moıyndamaǵan edi. Oblystyq sotta atap ótkendeı, úkim áli zańdy kúshine engen joq. Aıyptaýshy tarap joǵary turǵan sot ınstansııasyna shaǵymdanýyna bolady.
