Senatorlar – Ábdáli Nuralıev pen Bekbolat Orynbekov Jambyl oblysyna sapary kezinde Qordaı aýdanynyń turǵyndarymen kezdesip, aýyl turǵyndarymen óńirdegi problemalardy talqylady. Gvardeısk kentindegi Bıologııalyq qaýipsizdik problemalary ǵylymı-zertteý ınstıtýtynyń bazasynda ótken jergilikti aktıvpen kezdesýde senatorlar pandemııa kezinde ortalyq qyzmetkerleriniń qyzmetine erekshe mán berilgenin atap ótti. Depýtattar sonymen qatar Kenen Ázirbaevtyń ádebı-memorıaldyq murajaıynda boldy. Onda ótken jyly kúrdeli jóndeý júrgizilgen bolatyn.
* * *
Senatorlar Álı Bektaev pen Álimjan Qurtaev Túrkistan oblysyna sapary barysynda máslıhat depýtattarymen jáne Shardara, Jetisaı jáne Maqtaaral aýdandarynyń aktıvimen onlaın-kezdesý ótkizdi. Álı Bektaevtyń aıtýynsha, elimiz Prezıdentiniń jańǵyrtý jónindegi kún tártibin iske asyrý senatorlar jumysynyń negizgi basymdyqtary boldy. Kezdesýde máslıhat depýtattary áli de óz sheshimin talap etetin máselelerdi kóterip, birqatar usynys aıtty. Olardyń qatarynda oblystyń Shardara jáne Jetisaı aýdandarynda fermerlerdi otynmen jáne tyńaıtqyshtarmen der kezinde qamtamasyz etý, sondaı-aq sapaly medısınalyq qyzmet kórsetý máselesi bar.
* * *
Senat depýtattary – Nurjan Nursıpatov pen Altynbek Nuhuly Pavlodar oblysyna jasaǵan sapary aıasynda óńir basshysy Ábilqaıyr Sqaqovpen epıdemııalyq jaǵdaı jáne daǵdarysqa qarsy qabyldanyp jatqan sharalardy talqylady. Depýtattar óńirge jumys sapary barysynda oblystyń ulttyq qaýipsizdik, quqyq qorǵaý jáne sot organdary qyzmetkerlerimen kezdesti.
Nurjan Nursıpatov Parlament depýtattarynyń bastamasymen ázirlengen «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń Memlekettik shekarasyn kúzetý jáne ulttyq qaýipsizdik máseleleri boıynsha ózgerister men tolyqtyrýlar engizý týraly» zańǵa toqtaldy. Ol sondaı-aq qujat ulttyq qaýipsizdik organdarynyń basqarý qyzmetin ońtaılandyrýǵa múmkindik bergenin aıtty. UQK Shekara qyzmetiniń ókilderi de osy zańnyń qabyldanýynyń oń áserin atap ótti.
* * *
Senat depýtaty Dúısenǵazy Mýsın Shyǵys Qazaqstan oblysynda aýyl turǵyndarymen kezdesý kezinde shaǵyn jáne orta bıznesti qoldaý, agroónerkásiptik keshendi damytý máseleleri keńinen talqylandy. Naqty aıtqanda, Glýhovka aýylynyń sharýalary men sala mamandary nesıelendirýdi jeńildetý jáne veterınarlyq sektordy damytýdyń perspektıvalary jóninde ózderin alańdatqan túıtkilderge toqtaldy. Senator óńirdegi ózekti máselelerdiń biri koronavırýsqa qarsy ekpe saldyrý jumysyna da erekshe nazar aýdardy. Sonyń aıasynda Dúısenǵazy Mýsın jergilikti emhananyń jumysymen tanysty. Sonymen qatar ol Besqaraǵaı aýylyndaǵy kolledjge arnaıy bardy. Oqý ornynyń materıaldyq-tehnıkalyq bazasymen tanysyp, kolledj basshylyǵymen jáne oqytýshylarymen birge agroónerkásiptik keshen salasyna qajetti maman daıarlaý máselesin talqylady.
* * *
Senator Vladımır Volkov Almaty oblysynyń Qarasaı aýdanynda boldy. Ol aýdandyq máslıhat depýtattarymen kezdesip, Senattyń zań shyǵarý qyzmetine, atap aıtqanda, Parlamentte qaralyp jatqan «Qazaqstan Respýblıkasynyń keıbir zańnamalyq aktilerine aýdandyq, qalalyq jáne aýyldyq bılik deńgeıleriniń derbestigi men jaýapkershiligin keńeıtý máseleleri boıynsha ózgerister men tolyqtyrýlar engizý týraly» zań jobasyna toqtaldy, onda jergilikti bılik organdaryna qosymsha fýnksııalar berý, bıýdjettik rásimderdi ońaılatý, máslıhattardyń tıimdiligin arttyrý jáne t. b. máseleler kózdelip otyr. V.Volkov máslıhat depýtattaryn zań shyǵarý prosesine belsendi qatysýǵa jáne óńirdiń ózekti máselelerin sheshý úshin Parlamentpen ózara is-qımyl jasaýǵa shaqyrdy.
