Sýretti túsirgen Bolat Omarálıev
Biz buǵan deıin de baıyrǵy kózmergenniń «Soǵys jesirleri» taqyrybyna túsirgen birqatar sýretterin jarııalaǵan edik.
– Bul sýretti 1985 jyldary túsirdim. Bir-eki ret gazetke usynyp kórip edim, eshkim unata qoıǵan joq. Biraq sýrettiń qundy ekenin bilip, «negatıvin» tastaǵan joqpyn. Saǵynyshtan ábden tózimi taýsylǵan ananyń eshkimge kónbeı «Máńgilik alaý» basynda barynsha zarly daýyspen jylap, jatyp qalǵanyn taspaǵa tarttym, – deıdi áriptes aǵa.
Sóıleıtin sýret túsirý, sátti kadr jasaý ekiniń birine buıyrmaǵan qabilet. Onyń ústine kózdi ashyp-jumǵansha sátti kadr ustatpaı ketedi. «Sýretke túsirýge zorǵa úlgerdim» degen fototilshi bul kúndi bylaı dep eske alady.
– Bir jaǵynan bireý jylap tursa, men ony sýretke túsirsem, syrt kózge yńǵaısyz, uıat kórinedi. Myna kórinisten tolqymaý múmkin emes. Ol kezde soǵys jesirleriniń kóbi tiri edi. Osy foto bastama boldy ma, bilmedim, «Soǵys jesirleri» degen atpen eki jyldaı jesirler ómirinen kóp sýret túsirdim.
«Jesirler jylasa, meniń de qosyla jylaǵan sátterim boldy. Ondaı jerde shydaý múmkin emes. 1983 jyly Máskeýde Qazaqstan fotoóner sheberleriniń kórmesi ótti. Osy sýret sol kórmege qatysty», deıdi Bolat Omarálıev.
Eger sýretterdiń dybysy bolsa, biz sózsiz jesir qalǵan analarymyzdyń tóbe shashty shymyrlatar zarly joqtaýyn, saǵynyshyn estýge dátimiz shydar ma edi! Soǵys jesirleri jylaıdy.
Bastapqyda 1979 jyly Shıeli aýdany, Sulýtóbe aýylynda eskertkishke tesile qarap jylap turǵan bir áıeldi zorǵa túsirip úlgergen fototilshi osy kadrdan keıin «Soǵys jesirleri» serııasyn eki jyldaı jalǵastyrǵan. Bul týyndysyn Qyzylorda qalasyndaǵy «Máńgilik alaý» memorıalynda túsirgen.
ALMATY
