Darııa deńgeıiniń tómendeýine baılanysty bul jerden aıaq sý tartý múmkin bolmaı tur. Sonyń saldarynan turǵyndar aıaq sýdan tapshylyq kórýde. Jaýaptylar jaǵdaıdy ońaltý maqsatynda nasosty qaıta ornalastyrý jumystaryn júrgizip jatyr.
Ábilqaıyr han kóshesindegi sý tartý qurylyǵysynyń da jumysyn bastaýyna sý deńgeıiniń tómendeýi kedergi bolyp tur. Qala ákiminiń orynbasary Elmurat Rahmatýllaevtyń aıtýynsha qosalqy qubyr jalǵap, sý shyǵarýǵa bolady. Shahar basshysy mamyr aıynyń 10-na deıin tıisti jumystardy júrgizip, nasosty iske qosýdy júktedi.
Syr Ana monýmentiniń janynan sý tartyp, Araı kanalyna jiberetin nasostyń da ornyn almastyryp, qaıta qurý jumystary júrgizilýde. Syrdaǵy sýdyń tómendigi nasosty birneshe metr tómen túsirýdi qajet etken. Oryn almastyrý jumystary 10-mamyrda tolyǵymen aıaqtalatyn bolady. «Syrdyń jaǵasynda turyp, aıaq sýdan tapshylyq kórmeýimiz kerek», - degen shahar basshysy nasosty mejelegen ýaqyttan keshiktirmeı qosý kerek ekendigin basa aıtty.
Al Jibek joly kanalyna sý aıdaıtyn stansııa 20-sáýirden bastap júıeli jumys istep tur. N.Nazarbaev dańǵylynyń boıynda ornalasqan qaladaǵy negizgi aryq júıelerin aıaq sýmen qamtıtyn stansııada 4 nasostyq qurylǵy ornatylǵan. Onyń ekeýi úzilissiz jumys istese, qalǵan ekeýi qosalqy qurylǵylar. Qala ákimi bul aýmaqtaǵy nasostardyń da jumysymen tanysty.
Jalpy qala boıynsha uzyndyǵy 54,6 shaqyrym aryq júıeleri men 31,3 shaqyrym bolatyn 20 kanal bar. Kanaldar boıyna qalany aıaq sýmen qamtýǵa arnalǵan 13 nasos qondyrǵylary ornatylsa,qosymsha jasyl jelekterdi sýarýǵa arnalǵan arnaıy 11 dana jer asty uńǵymalary jumys isteıdi.
Aralaý barysynda shahar basshysy qalany aıaq sýmen qamtý kún tártibinen túspeıtin ózekti másele ekendigin aıtyp, máseleniń tolyqqandy sheshimin taýyp, túıtkildiń túıinin tarqatý joldary áli de qarastyrylatyndyǵyn jetkizdi.
