Qostanaı oblysy Qarasý aýylynyń ákimi Ǵasyrseıit Qorjynbaevqa qylmyskerdi ustaýǵa kómekteskeni úshin IIM logotıpi bar saǵat syılap, gramotamen marapattaǵan.
Eske salaıyq, adam óltirý oqıǵasy Qostanaı oblysy Amangeldi aýdany Qarasý aýylynda bolǵan. «102» pýltine polısııa qyzmetkerlerin jiberý týraly ótinishpen jasyryn habarlama túsken. Shaqyrtýǵa barǵan ýchaskelik polıseı zorlyq-zombylyq belgileri bar 55 jastaǵy aýyl turǵynynyń máıitin tapqan. Sondaı-aq, pyshaq jaraqaty saldarynan egde jastaǵy áıel aýrýhanaǵa tústi. Qylmys ornyna kelgen ýchaskelik polısııa qyzmetkeri men aýyldyq okrýg ákimi kúdiktini izdeýge shyqqan. Kýágerlerdiń aıtýynsha, kúdikti tasjolǵa qaraı bet alǵan.
Ákim adam óltirgen kúdiktini ýchaskelik polısııa qyzmetkerimen birge ustaǵan. Polısııa ókilderi tutqyndaý prosesi qalaı ótkenin aıtyp berdi.
«47 jastaǵy er adamnyń izine (kúdikti) ýchaskelik polıseı men aýyl ákimi túsken. Ákim kúdiktini baıqap, kómek shaqyrǵan. Alaıda er adam ózine jaraqat salyp úlgergen. Ol aýdandyq aýrýhanaǵa jatqyzyldy», dedi Qostanaı oblystyq polısııa departamenti ókilderi.
