Eki el basshylarynyń birinshi ret sóılesip otyrǵanyn eskerip, Qasym-Jomart Toqaev Ioshıhıde Sýgany Japonııa Premer-Mınıstri bolyp saılanýymen quttyqtap, onyń asa jaýapty qyzmetine tolaǵaı tabys tiledi.
Memleket basshysy Tokıoda ótetin jazǵy Olımpıada oıyndaryna baılanysty Japonııa halqyna júrekjardy sálemin joldap, atalǵan aýqymdy shara adamzattyń koronavırýsty jeńgeniniń kórinisi bolatynyna senim bildirdi.
Prezıdent Japonııa Úkimetiniń COVID-19 indetine qarsy kúreste Qazaqstanǵa kórsetken qoldaýy men gýmanıtarlyq kómegi úshin alǵys aıtty. Qasym-Jomart Toqaev qazirgi ýaqytta elimiz pandemııanyń saldaryn eńserý úshin naqty sharalar qabyldaǵanyn, halyqqa jappaı vaksına egý jumystarynyń, onyń ishinde, «QazVac» otandyq ekpesiniń de salynyp jatqanyn atap ótti.
Taraptar qazaq-japon qarym-qatynastarynyń qazirgi jaǵdaıy men damý perspektıvalaryn talqylady.
Memleket basshysynyń aıtýynsha, Japonııa Qazaqstanǵa qarjy quıyp otyrǵan on iri ınvestordyń qataryna kiredi jáne Azııadaǵy mańyzdy strategııalyq seriktesteriniń biri. Búginde bizdiń elimizde Japonııa qarjylandyratyn 50-den asa kásiporyn men kompanııa tabysty jumys istep jatyr.
Qazaqstan Prezıdenti qazirgideı álemdik konıýnktýra qubylyp turǵan kezde ekijaqty yntymaqtastyqty jańa ári sapaly deńgeıge kóterý kerek dep sanaıdy.
Atap aıtqanda, Qasym-Jomart Toqaev aýyl sharýashylyǵy, geologııalyq barlaý, sıfrlandyrý jáne jasandy ıntellekt salalaryn naqty ınvestısııalyq jobalarmen tolyqtyra otyryp, jańa ekonomıkalyq jospar ázirleýdi usyndy. Eki eldiń ǵasyr ortasyna qaraı kómirtegi derbestigine qol jetkizý jónindegi mindettemelerin eskerip, jasyl energetıka baǵytyndaǵy yntymaqtasty damytý boıynsha da mol múmkindiktiń bar ekeni aıtyldy.
Osyǵan baılanysty Memleket basshysy joǵaryda atalǵan máselelerdi talqylaý úshin jýyq arada Úkimet basshysynyń orynbasary bastaǵan qazaqstandyq delegasııany Japonııaǵa jiberý týraly sheshim qabyldaǵanyn habarlady.
Ioshıhıde Sýga Qazaqstanmen aradaǵy strategııalyq seriktestikti odan ári keńeıtýge múddeli ekenin naqtylap, qazaqstandyq delegasııanyń saparyn uıymdastyrýǵa yqpal etýge daıyndyǵyn jetkizdi. «2022 jyly Qazaqstan men Japonııa arasyndaǵy dıplomatııalyq qatynastardyń ornaǵanyna 30 jyl tolady. Bul ekijaqty baılanystar boıynsha naqty nátıjelerge qol jetkizýdiń mańyzdy kezeńi bolýy tıis», – dedi Japonııa Premer-Mınıstri.
Ioshıhıde Sýganyń aıtýynsha, Qazaqstan Ortalyq Azııadaǵy kóshbasshy el, munda ózge memlekettermen salystyrǵanda Japonııanyń kompanııalary kóptep jumys isteıdi.
Osy rette Qasym-Jomart Toqaev Qazaqstan men Japonııa arasyndaǵy yntymaqtastyqtyń óńirdegi, onyń ishinde, «Ortalyq Azııa – Japonııa» dıalogy aıasyndaǵy yqpaldastyqtyń qozǵaýshy kúshi bolýǵa múmkindigi bar ekenin aıtty.
Sonymen qatar taraptar halyqaralyq saıasattyń ózekti máseleleri jóninde de pikir almasty. Atap aıtqanda, Japonııa Premer-Mınıstri Soltústik jáne Ońtústik-Shyǵys Azııadaǵy ahýalǵa qatysty óziniń paıymymen bólisti.
Memleket basshylary kópjaqty baılanystardyń barlyq salasy boıynsha ózara senimdi dıalog pen konsýltasııalardy jalǵastyrýǵa ýaǵdalasty.
Áńgimelesý sońynda Qasym-Jomart Toqaev Ioshıhıde Sýgany ózine yńǵaıly ýaqytta Qazaqstanǵa saparmen kelýge shaqyrdy.
