Depýtattar sapar barysynda áleýmettik mańyzy bar nysandardy, onyń ishinde mektepterdi, aýrýhanalardy, sport keshenderin aralady. Olar birqatar qurylys jáne jóndeý jumystarymen, sondaı-aq pandemııa kezindegi jumys erekshelikterimen tanysty. Depýtattar, bir jaǵynan, olardy sheshý úshin zańnamalyq ózgeristerdi talap etetin júıeli problemalardy anyqtaýdy, ekinshi jaǵynan, senatorlar óz baqylaýyna alatyn jergilikti máselelerdiń tizimin jasaýdy ózderiniń basty mindeti retinde belgiledi.
Senatorlar Otan qorǵaýshy kúni men Jeńis kúni qarsańynda áskerı qyzmetshilermen, quqyq qorǵaý organdary men sot júıesiniń qyzmetkerlerimen kezdesti. Osy kezdesýlerge qatysýshylar áskerı qyzmetshilerdi áleýmettik qorǵaýǵa jáne bolashaq ofıserlerdi daıarlaý sapasynan bastap sot tóreligin iske asyrý júıesin jetildirýge baǵyttalǵan jańa zańdarǵa deıingi aýqymdy máselelerdi talqylady.
* * *
Senator Muhtar Qul-Muhammed elimizdiń Qorǵanys mınıstrliginiń jetekshi áskerı oqý oryndarynyń professorlyq-oqytýshylyq quramymen jáne kýrsanttarymen kezdesý ótkizdi. Senator joǵary bilimdi, utqyrlyǵy jáne tártibimen erekshelenetin ári el taǵdyryna jaýapkershilikpen qaraıtyn kýrsanttardy oqytý joǵary dárejede uıymdastyrylǵanyn atap ótti, sondaı-aq joǵary áskerı oqý oryndarynyń basshylaryna olardyń jumysy úshin alǵys aıtty.
«Elimizdiń egemendigi, aýmaqtyq tutastyǵy, oǵan eshkimniń tıispeıtini jáne onyń bólinbeıtindigi, etnosaralyq kelisim men halqymyzdyń birligin saqtaý jáne bolashaq urpaqqa jetkizý qajettigi – basty qundylyqtar», dep atap ótti M.Qul-Muhammed.
* * *
Áleýmettik sala qyzmetkerleri osyndaı kezdesýler barysynda senatorlar aldynda respýblıkalyq deńgeıde óz sheshimderin talap etetin júıeli máselelerdi kóterdi. Senattyń Qarjy jáne bıýdjet komıtetiniń tóraǵasy Olga Perepechına Soltústik Qazaqstan oblysynda óńirdiń medısına qyzmetkerlerimen densaýlyq saqtaý salasyn qarjylandyrý máselesin talqylady. Onkologııalyq naýqastarǵa hımıoterapııalyq kómekti qarjylandyrýdaǵy qıyndyqtar, medısınalyq jabdyqtardyń qoljetimdiligi jáne densaýlyq saqtaý uıymdarynyń shyǵyndary problemalardyń biri bolyp otyr.
«Durys yńǵaıly jáne tıimdi emdeýdi qamtamasyz etý sizderdiń mindetterińiz, biraq ol jetkilikti dárejede qarjylandyrylmasa múmkin bolmaıdy. Jyl saıyn respýblıkalyq bıýdjettiń qomaqty kólemi densaýlyq saqtaý salasyna baǵyttalady. Atalǵan problemalar basqa óńirlerde de kezdesedi dep oılaımyn. Tıisinshe, mundaı máselelerdi Densaýlyq saqtaý mınıstrligi deńgeıinde kóterý qajet. Men onymen aınalysatyn bolamyn», dedi senator O.Perepechına.
* * *
Senattyń Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Dáýren Ádilbekovtiń Aqmola oblysy Sandyqtaý aýdanynyń turǵyndarymen kezdesýinde de densaýlyqty saqtaý máseleleri kóterildi. Depýtat sapar barysynda barlyq qoıylǵan talaptarǵa sáıkes keletin ári tolyq jabdyqtalǵan jańa sporttyq-saýyqtyrý kesheninde boldy. Senator elimizde buqaralyq jáne balalar sportyn damytýǵa eń joǵary deńgeıde erekshe nazar aýdarylyp otyrǵanyn atap ótti. El Prezıdenti Qasym-Jomart Toqaev Qazaqstan halqyna Joldaýynda jáne bıylǵy jyldyń qańtarynda VII saılanǵan Parlamenttiń birinshi sessııasynyń ashylý saltanatynda sóılegen sózinde dál osy mindetti sheshýdiń basymdyǵyn atap ótken bolatyn.
«Búgingi tańda elimizde sport ınfraqurylymyn kóbeıtýge basa nazar aýdarylyp otyr. Mundaı nysandardyń qurylysy buqaralyq sporttyń damýyna serpin beredi, demek, salamatty ómir saltyn ustanýshylar sanyn arttyrady. Bul turǵyda Sandyqtaý aýdany oblystaǵy sport kóshbasshylarynyń biri bolyp tabylady», dep atap ótti D.Ádilbekov.
