Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń birinshi orynbasary Aıdos Mamyttyń aqparatyna qaraǵanda, qarjylaı yntalandyrý syıaqysy dáleldengen sybaılas jemqorlyq deregi úshin ǵana beriledi. Byltyr sybaılas jemqorlyq derekteri óńirdegi polısııa, densaýlyq saqtaý, bilim berý jáne qurylys organdarynda jıi anyqtalypty.
«Máselen, bıylǵy 22 naýryzda saǵat 16:45-te senim telefony arqyly Atyraý temirjol stansasynda jelilik polısııa bólimi qyzmetkerleriniń bekire tuqymdas balyqtardy áketý deregimen qylmystyq jaýapkershilikke tartpas úshin 50 myń teńge kóleminde para talap etkeni týraly habar tústi. Sol kúni osy derekke baılanysty eki polısııa qyzmetkeri ustaldy. Keıin polısııa qyzmetkerleri sottaldy. Al, habar bergen adamǵa 70 AEK nemese 204 myń 190 teńge mólsherinde aqshalaı syıaqy berildi. Byltyr sybaılas jemqorlyq deregi týraly habarlaǵany úshin 11 adam 1,8 mln teńgeden astam qarjylaı syıaqy aldy. Osy jyldyń úsh aıynda óńirdegi osyndaı habarlamalar úshin 4 adam jalpy somasy 700 myń teńgeden astam syıaqyǵa ıe boldy», dedi Aıdos Mamyt.
