Qasym-Jomart Toqaevqa taý-ken metallýrgııalyq korporasııasynyń 2020 jylǵy qarjylyq jáne óndiristik qyzmetiniń nátıjeleri men bıylǵy birinshi toqsandaǵy jumysy jaıynda baıandaldy.
Aleksandr Mashkevıch pen Patoh Shodıev Eýrazııalyq top kásiporyndarynyń júzege asyryp jatqan ınvestısııalyq jáne áleýmettik jobalary jaıynda aıtty. ERG kompanııalar toby Qazaqstanda jumys istegen 25 jyl ishinde óndiriske 13 mıllıard dollardan astam ınvestısııa salǵan, al, áleýmettik baǵytqa 1 mıllıard dollardan asa qarjy jumsaǵan. Byltyrǵy jyldyń qortyndysy boıynsha kásiporyn 221 mıllıard teńge salyq tólegen.
Aleksandr Mashkevıch pen Patoh Shodıev Qasym-Jomart Toqaevqa óndiris nysandarynda COVID-19 indetiniń taralýyna jol bermeýge qatysty qabyldanyp jatqan sharalar, sondaı-aq, korporasııanyń pandemııamen kúreske qosqan úlesi jaıynda málimet berdi. ERG kompanııalar toby indetpen kúreske 5,6 mıllıard teńgeden astam qarjy bóldi. Atalǵan qarjy kompanııa jumys istep jatqan óńirlerge dári-dármek satyp alýǵa, aýrýhanalardy qajetti quraldarmen jabdyqtaýǵa jumsaldy. Búginde kásiporyn qyzmetkerleri erikti túrde koronavırýsqa qarsy ekpe saldyryp jatyr.
Kezdesý barysynda jańa ınvestısııalyq jobalardyń júzege asyrylýy talqylandy. ERG kompanııasy jýyq arada jalpy somasy 5,9 mıllıard AQSh dollary kóleminde ınvestısııa salýdy josparlap otyr.
Memleket basshysy jobalarda qazaqstandyq mazmunnyń kólemin jáne bıznestiń áleýmettik jaýapkershiligin arttyrýǵa erekshe kóńil bóle otyryp, belgilengen josparlardy óte qysqa merzimde jáne barynsha tıimdi oryndaýǵa shaqyrdy.
