Is boıynsha úkim 27 sáýirde jarııalanýy kerek edi. Biraq sýdıa Qajymuhan Mekemtas keńesý bólmesinen oralyp, qamaýǵa alynǵan adamnyń qandaı múlki baryn anyqtaý úshin sot tergeýin qaıta bastaýǵa buıryq bergen edi.
Búgin, ıaǵnı, 17 mamyrda sýdıa jaryssózdiń bastalǵanyn jarııalady. Prokýror Dıas Iаngalyshov elordanyń jolaýshylar kóligi jáne avtomobıl joldary basqarmasynyń burynǵy bastyǵy Rashıd Amanjolovty 11 jylǵa bas bostandyǵynan aıyrýdy, memlekettik qyzmette qyzmet atqarýǵa tyıym salýdy, jazasyn qaýipsizdigi barynsha joǵary kolonııada óteýdi surady.
О́z sózinde ol R.Amanjolov pen J.Nurpeıisovtiń bul qylmysta erekshe rólge ıe ekenin aıtty.
Prokýror Nur-Sultan qalasy máslıhatynyń burynǵy depýtaty jáne hatshysy Janat Nurpeıisovtiń múlkin tárkilep, memlekettik qyzmette, jergilikti ózin-ózi basqarý organdarynda, Ulttyq bank pen onyń vedomstvolarynda, kvazımemlekettik uıymdarda 5 jyl merzimge laýazymdardy atqarýǵa tyıym salyp, 9 jylǵa qamaýdy talap etti. Sonymen qatar «Qurmet» ordeninen aıyrý usynyldy.
Al «Astana Innovations» AQ basqarma tóraǵasy bolǵan Talǵat Áshimniń 11 jylyn ortasha qaýipsiz kolonııada ótkizýin surady.
«Astana LRT» kompanııasymen yntymaqtasqan kásiporyndardyń qyzmetkerlerine 7 jyldan 11 jylǵa deıin bas bostandyǵynan aıyrý jazasy taǵaıyndaýdy ótindi.
Ulyqbek Achılovtyń múlki tárkilenip, 11 jylǵa bas bostandyǵynan aıyrylýy múmkin.
Tımýr Qasabaevqa 8 jyl, Dýlat Mýsenovtiń múlkin tárkilep, 7 jylǵa qamaý usynyldy.
Sol sekildi Dáýren Ábdihamıtov 11 jylǵa sottalýy múmkin.
Aıta keteıik, taǵy eki kúdikti Interpol jelisi boıynsha izdeýde. Olardyń esimderi - Talǵat Ardan jáne Qanat Sultanbekov. Birinshisi – «Astana LRT» basshysy, ekinshisi – Nur-Sultan ákiminiń orynbasary bolǵan.
