Bul baǵdarlama boıynsha 2 jastan 14 jasqa deıingi qazaqstandyqtarǵa áýe bıleti tegin beriledi. 2022 jyldyń qańtarynan bastap top-10 týrıstik aýmaq baǵyttary boıynsha sapardy brondaýǵa bolady.
«Kıds goý frı» (Balalar tegin saıahattaıdy) baǵdarlamasynyń negizgi maqsaty – qazaqstandyqtardy elimizdiń týrıstik baǵyttarynda búkil otbasymen demalýǵa yntalandyrý. Buǵan balalardyń áýe bıletin sýbsıdııalaý kómektesedi. Mádenıet jáne sport mınıstrliginiń boljamynsha, bul demalysty 30 paıyzǵa deıin arzandatýǵa múmkindik beredi.
«Zań 2022 jyldan bastap oryndalady, óıtkeni zańnamaǵa sáıkes bıýdjettik qarjylandyrýdy talap etetin barlyq norma kelesi jyldan bastap kúshine enedi. Atalǵan zańǵa qol qoıyldy, endi erejeler jobasy men onyń jumys isteý mehanızmi ázirlenip jatyr. Jyl basynan bastap qazaqstandyq týroperatorlar «Kıds goý frı» baǵdarlamasy qosylǵan týrpaketterdi satýdy bastaıdy. Baǵdarlamany talqylaý jáne naryqpen kelisý barysynda qandaı da bir túzetýler bolýy múmkin, biraq ázirge ózgerister josparlanbaǵan jáne bári de sol kúıinde qalyp otyr», dedi Mádenıet jáne sport mınıstrligi Týrızm ındýstrııasy komıtetiniń tóraǵasy Dastan Ryspekov.
Baǵdarlamaǵa Qazaqstannyń 14 jasqa deıingi azamattary qatysa alady. «Kıds goý frı» qosylǵan týrıstik ónimdi satyp ala otyryp, balalar týrıstik oryndardyń aýmaǵynda keminde úzilissiz bes kún jáne tórt tún turýǵa mindetti.
