Byltyr pandemııaǵa baılanysty qazan aıynda ótkizilgen áıgili jarys bıyl dástúr boıynsha ádettegideı mamyr aıynda bastaldy. 104-márte uıymdastyrylyp jatqan osy jylǵy jarysta 23 komandanyń 184 veloshabandozy óner kórsetýde. Olardyń qatarynda jyl saıyn iri jarystarda joǵary oryndarǵa qol jetkizip júrgen qazaqstandyq-kanadalyq Astana-Premier Tech klýby da bar.
Velokópkúndiktiń ataýy «Djıro d’Italııa» bolǵanymen, jarys Italııadan bólek, Slovenııa jáne Shveısarııa tas joldarynda da uıymdastyrylady. Týrınnen bastaý alyp, Mılanda óz máresine jetetin básekede veloshabandozdar jalpy uzyndyǵy 3479,9 shaqyrym joldy júrip ótýi tıis. Búginde jarystyń 10 kezeńi artta qalyp, sportshylar atalǵan qashyqtyń teń jartysyna jýyq jolyn basyp ótti. Ázirshe, jalpy esepte 24 jastaǵy kolýmbııalyq veloshabandoz Egan Bernal kósh bastap keledi. 9-kezeńdegi taýly jolda aldyna jan salmaǵan Bernal máre syzyǵyn ózgelerden buryn kesip, kezeń jeńimpazy atandy. Ol – 10 kezeńnen keıingi jalpy esepte kósh bastaǵan tórtinshi veloshabandoz. Alǵashqy úsh kezeńde ıtalııalyq Fılıppo Ganna kúlgin jeıdeni kıse, keıinnen birde-bir kezeńde jeńimpaz atanbaǵan taǵy bir ıtalııalyq sportshy Alessandro De Markı eki kezeń boıy top basynda boldy. Sondaı-aq De Markı sııaqty úzdikter qatarynan kórinbegen majarstandyq Attıla Valter de úsh kún qatarynan jalpy kezeńde kósh bastady.
Al Astana-Premier Tech klýbyn Apennın túbegine kapıtan retinde bastap barǵan 24 jastaǵy reseılik veloshabandoz Aleksandr Vlasov 10 kezeńnen keıin jalpy esepte úshinshi orynda keledi. Ol kúlgin jeıde ıesi Egan Bernaldan bar-joǵy 22 sekýnd artta tur. Áli alda 11 kezeń bar ekenin eskersek, jaǵdaı san márte ózgerýi ábden múmkin.
Jalpy «Astana» kapıtany «Djıro d’Italııa» grand-týryna osymen ekinshi márte qatysyp jatyr. Degenmen onyń osy jarystaǵy byltyrǵy debıýti asa sátti bola qoıǵan joq. Sebebi velokópkúndiktiń alǵashqy eki kezeńinen keıin densaýlyǵyna baılanysty jarysty erte aıaqtaýǵa májbúr bolyp edi. Osylaısha óziniń alǵashqy grand-týr básekesin sońyna deıin jalǵastyra almaǵan-dy. Mine, araǵa jyl salyp reseılik sportshy Italııadaǵy jarysqa komanda kapıtany retinde keldi.
«Djıro» aldynda Aleksandr Vlasov Astana-Premier Tech klýbynyń baspasóz qyzmetine bıylǵy jarys týraly óz oıyn bildirip, sýperkópkúndikte jaqsy nátıje kórsetýge tyrysatynyn aıtqan edi.
– Byltyrǵy «Djıro-2020»-da ekinshi kezeńnen keıin jarystan shyǵyp qalǵan soń, ózimdi Italııada bastaǵan isim aıaqtalmaı qalǵan sııaqty sezinip júrmin. Osy jarystaǵy basty maqsatym – birinshi kezeńnen bastap, sońyna deıin jaraqatsyz júrip ótip, ár kezeńde barynsha joǵary nátıje kórsetý. Bıylǵy dodaǵa qatysyp jatqan sportshylardyń qatarynda álemniń eń úzdik jáne tájirıbeli birneshe shabandozy bar. Dese de úzdiktermen jarysýda aıanyp qalmaımyn. Mılanda ótetin jarystyń fınalynda qaı orynda bolatynymdy báseke sońynda kóre jatarmyz», degen edi A.Vlasov.
Ázirge Aleksandrdyń bıylǵy «Djıro d’Italııadaǵy» joryǵy jaman emes. Alǵashqy eki kezeńde ózin jaqsy qyrynan kórsete almaǵan reseılik veloshabandoz úshinshi kezeńnen bastap úzdikter qataryna qosyldy. Birinshi kezeńdegi qysqa, biraq joǵary jyldamdyqpen Týrınde ótken jekeleı jarysta 11-orynǵa ıe bolsa, 179 shaqyrymǵa sozylǵan ekinshi kezeńde márege 47-shi bolyp jetti.
Bıelle men Kanale qalalaryn jalǵaǵan úshinshi kezeńde Astana-Premier Tech sapynan bul kezeńde ıtalııalyq Fabıo Fellını úzdik boldy. Fabıo máre syzyǵyn 17-shi bolyp kesti. Al Vlasov bolsa, bul kezeńdi nebári 41-shi orynmen túıindedi. Degenmen ýaqyt kórsetkishi jaǵynan táýir nátıjege ıe bolǵan ol osy kezeńnen bastap TOP-10 sportshynyń qataryna qosyldy. 5-kezeńde altynshy, al 6-kezeńde tórtinshi orynǵa kóterile aldy. 6-kezeńdegi tolassyz jaýǵan jańbyr men aýa temperatýrasynyń tómendeýi jáne úsh asýy bar bul kezeń barlyq veloshabandoz úshin naǵyz synaq boldy. Jarys sońyna deıin favorıtter tobynda bolǵan Aleksandr Vlasov márege 10-shy bolyp keldi.
Keıingi eki kezeńde de Vlasov jarys jolyn kóshbasshylarmen birge júrip ótip, jalpy eseptegi 4-ornyn saqtap qaldy. Al alǵashqy 10 kúndiktiń 9-shy kezeńi velosportshylar úshin eń tartysty jarys kúni boldy. Sebebi Kampo Felıche asýynda máresine jetken taýly kezeń «Djıro d’Italııanyń» bas klassıfıkasııasyna aıtarlyqtaı ózgerister alyp keldi. Astana-Premier Tech komandasynyń kapıtany bul kúni márege úshinshi bolyp kelip, sýperkópkúndiktiń jalpy esebinde 3-orynǵa kóterildi.
Seısenbi kúni tynyǵyp alǵan velosportshylar keshe qaıta jarys jolyna shyqty. Veloshabandozdardy alda bes taýly, bir orta deńgeıdegi taýly, tórt jazyq kezeń jáne bir qysqa qashyqtaǵy sprınt jarysy kútip tur.
