Nurjan Áshimbetovtiń Aqsý qalasynyń ákimi bolyp taǵaıyndalǵanyna nebári tórt aı ǵana bolǵanymen, qyzmetine kiriskeli beri basynan daý-damaı arylmaı keledi. Sebebi ákim bolyp taǵaıyndalǵaly beri sógis te alyp úlgergen, ústinen qyzmettik tekseris te júrgizilgen. Tipti oblys ákimi Ábilqaıyr Sqaqov ózine baǵynǵysy kelmegen qyzmetkerdiń isin óńirdiń Ádep jónindegi keńesiniń qaraýyna jibergen.
Jaqynda Memlekettik qyzmet isteri agenttiginiń Pavlodar oblysy boıynsha Ádep jónindegi keńesiniń músheleri Aqsý qalasynyń ákimi Nurjan Áshimbetovti jáne onyń ústinen ujymdyq shaǵym túsirgen qolastyndaǵy memlekettik qyzmetkerlerdiń oı-pikirlerin tyńdady. Ujymdyq shaǵymda qolastyndaǵylar qala ákiminiń dóreki, ádepsiz minez-qulqyn synǵa alyp, ony memlekettik qyzmetshiniń etıkasyn buzdy dep aıyptaǵan.
Aqsý qalasy ákiminiń ústinen túsken aryz-shaǵymdardy zerdeleı kele, keńes músheleriniń jeteýi ákimdi qyzmetinen bosatýǵa, úsh adam tártiptik jaza retinde eskertý jasaýǵa, taǵy bireýi sógis berý jóninde daýys bergen. Bul jóninde óńirdiń áleýmettik jelidegi resmı paraqshasynda Memlekettik qyzmet isteri agenttigi Pavlodar oblysy boıynsha departamentiniń baspasóz hatshysy Aınur Sádýaqasova habarlady. Baspasóz qyzmetkeriniń málimdeýinshe, Ádep jónindegi keńes otyrysynyń qorytyndysy boıynsha qala ákimin qyzmetinen bosatý týraly usynys jasalǵan.
Keńes músheleri Aqsý qalasynyń basshysyna qatysty usynystaryn onlaın ótken jıynda ortaǵa salǵan. Sybaılas jemqorlyqqa qarsy is-qımyl agenttigi Pavlodar oblysy boıynsha departamentiniń basshysy Ernazar Baıanǵazın Nurjan Áshimbetovtiń Aqsý qalasynyń ákimi laýazymyn atqarýǵa moraldyq turǵydan quqy joq degen pikirin bildirdi.
«Qala ákimi deńgeıindegi basshynyń mundaı minez-qulyq belgileri bolǵan kezde bul laýazymdy atqarýǵa moraldyq quqyǵy joq. Bul – meniń jeke pikirim. Sol sebepti atqaratyn laýazymyna sáıkestigi týraly máseleni qaraýdy usynar edim», dedi Ernar Baıanǵazın.
Ádep jónindegi keńestiń tóraǵasy, Memlekettik qyzmet isteri agenttigi Pavlodar oblysy boıynsha departamentiniń basshysy Erjan Qarymsaqov jıyn barysynda qala ákimi men onyń qol astyndaǵy qyzmetkerler arasynda syndarly dıalogtyń bolmaǵanyn atap ótti.
«Biz barlyq jaýap berýshilerdiń arasynda qaıtadan saýaldama júrgizip, tekserý jasadyq. О́ıtkeni Nurjan Kemeruly oblys ákimdigi tekserý júrgizý kezinde keıbir memlekettik qyzmetshilerdiń pikiri nazardan tys qalǵany, tyńdalmaǵany týraly aıtqan bolatyn. Sol sebepti biz barlyǵy ashyq, ári obektıvti bolýy úshin barlyq qyzmetkerdiń túsindirmelerin aldyq. Qyzmetkerler is júzinde fakt bolǵanyn kórsetip berdi. Sol sebepti Nurjan Áshimbetovtiń ákim qyzmetinde odan ári bolýy orynsyz dep sanaımyn», dedi E.Qarymsaqov.
Al Nurjan Áshimbetov Ádep jónindegi keńestiń otyrysynda ózine oblys ákimi bergen sógisti negizsiz dep sanaıtyndyǵyn aıtqan. Ol ózine oblys ákimi bergen sógis zańsyz dep, onyń ústinen sotqa aryz bergen. Al qala basshysynyń «meniń ústimnen zańsyz qyzmettik tekserý júrgizildi» degen talap-aryzy sotta qabyldanbaǵan. Endi Aqsý qalasynyń ákimine sógistiń zańdy, ne zańsyz berilgenin sot anyqtaıtyn bolady.
