Agroónerkásiptik keshendi damytýǵa elimizdiń basshylyǵy tarapynan basa nazar aýdarylyp otyr. Prezıdent Qasym-Jomart Toqaev óziniń Joldaýynda aýyl sharýashylyǵyn damymasa básekege qabiletti ekonomıka qalyptastyrý múmkin emes ekenin atap ótken bolatyn. Osyǵan baılanysty ol eldi azyq-túlik taýarlarymen qamtamasyz etý, aýyl turǵyndarynyń tabysyn arttyrý jáne eńbek ónimdiligin arttyrý jóninde birqatar mindetterdi alǵa qoıdy.
Sarapshylar sýarmaly jerlerdiń kólemin ulǵaıtý jáne olardy utymdy paıdalaný alǵa qoıylǵan mindetterdi oryndaýdyń negizgi kepili dep sanaıdy. Senat depýtattary máseleni egjeı-tegjeıli zerdeleý jáne osy salanyń jaǵdaıyn jaqsartý jóninde is júzindegi usynymdar ázirleý úshin salalyq komıtettiń kóshpeli otyrysyn ótkizdi. Tıisti mınıstrlikter men aımaqtyń basshylyǵy, agrarshylar, ǵalymdar men kásipkerler oflaın jáne onlaın tártibindegi osy syndarly áńgimege qatysty.
Senat komıtetiniń tóraǵasy Álı Bektaev otyrysty asha kelip, elimizdegi sýarmaly jerlerdiń kólemi jalpy ıgerilgen jerdiń kóleminiń 8%-ynan aspaıtynyn, al bul jerde aýyl sharýashylyǵyna tıisti barlyq jalpy óniminiń 35% óndiriletinin atap ótti. Degenmen, sýarmaly eginshiliktiń odan ári ulǵaıýyna birqatar problema kedergi keltirýde.
«Elimizdegi ırrıgasııalyq ınfraqurylymnyń jaǵdaıy syn kótermeıdi. Respýblıkalyq menshiktegi 19 772 shaqyrym kanaldyń 11 881 shaqyrymynyń jaǵdaıy qanaǵattanǵysyz. Sharýashylyqaralyq jáne sharýashylyqishilik arnalardyń 90%-y eskirgen, tehnıkalyq deńgeıi tómen. Osyǵan baılanysty elimizde ırrıgasııalyq júıelerdi qalpyna keltirý jóninde aýqymdy jumystar júrgizý qajet», dep atap ótti senator.
Kóshpeli otyrysty ótkizý orny kezdeısoq tańdalǵan joq. Elimizdiń barlyq sýarmaly jerleriniń 30%-y Túrkistan oblysynda shoǵyrlanǵan. Kezdesýde óńir basshysy О́mirzaq Shókeev te osy kórsetkishti odan ári arttyrý týraly óz oıymen bólisti.
«Túrkistan oblysynda sý qoımalary men magıstraldyq kanaldarda jóndeý jumystary qarqyndy júrip jatyr. «Keńsaı-Qosqorǵan 2» sý qoımasynyń qurylysy aıaqtalyp keledi. «Túrkistan» magıstraldy kanalynyń 59 km kúrdeli jóndeýden ótti, jalpy uzyndyǵy 751 km 161 kanal jasaldy. Ordabasy, Otyrar, Báıdibek, Saýran aýdandarynda, sondaı-aq Arys jáne Kentaý qalalarynda júrgizilgen jumystar sýarmaly jerlerdi sýmen qamtamasyz etýge múmkindik berip otyr», dep atap ótti Túrkistan oblysynyń ákimi.
Qazaqstan Respýblıkasynyń Aýyl sharýashylyǵy mınıstriniń orynbasary Rýslan Manataev búkil elimiz aýqymyndaǵy sýarmaly jerlerdi damytýdyń keleshegi týraly taqyrypty jalǵastyrdy. Sarapshylar kezdesý barysynda bul máselelerdi keshendi sheshý jáne túrli mekemelerdi tartý qajet ekenin atap ótti. Sondyqtan ekologııa, geologııa jáne tabıǵı resýrstar mınıstriniń orynbasary Serik Qojanııazov Qazaqstannyń sý qoryn paıdalaný jáne qorǵaý máseleleri týraly aıtyp berdi.
Talqylaý barysynda otyrysqa qatysýshylary kóptegen ózekti máselelerdi kóterdi, olarǵa quzyretti memlekettik organdardyń basshylary jaýabyn aıtyp, jan-jaqty túsindirme berdi.
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń músheleri óńirge sapary barysynda Túrkistan magıstraldy kanalyn jóndeý jumystarynyń barysymen, «Keńsaı-Qosqorǵan 2» sý qoımasynyń qurylysymen tanysty, sondaı-aq sý únemdeý tehnologııalary paıdalanylatyn «Túrkistan-Agro» JShS-tiń egis alqabynda boldy.
Senatorlar kóshpeli otyrys barysynda kóterilgen barlyq máselelerdi muqııat zerdelep, tıisti depýtattyq saýaldardy joldaýǵa jáne zań shyǵarý qyzmetinde paıdalanatyn bolady.
