Tabıǵat janashyrlarynyń taǵylymdy sharýasy

Mádenıet jáne sport mınıstrligi, Kazakh Tourism ulttyq kompanııasy, Jana Dunie qaıyrymdylyq qory, «Býrabaı Damý» seriktestigi jáne oblystyq týrızm basqarmasy, ulttyq park­tiń óz ujymy uıytqy bolǵan óne­geli is Býrabaı baýraıyn muntazdaı etip tazalaýmen ǵana emes, jalpaq jurttyń esine tamasha tabıǵatty aıalaı bilý kerek ekenin taǵy bir márte eske salýymen qundy. Qazbaýyr bultty jamylǵan jartastardyń betinde ne joq deısiz, kimniń qaıdan kelgeni, qashan kelgeni, «Sasha men Mashanyń máńgilik mahabbaty» týraly derekter kóz súrindiretin.

Olqylyqtyń orny taıaýda toldy. Boı jetetin, qol jetetin jerdegi jazý ataý­lynyń barlyǵy óshirildi. Endi taza, tabıǵı qalypta, baǵzy zamandaǵy pák kúıinde. Jazý ǵana emes, jyldar boıy aǵash-aǵashtyń baýyrynda, qoıtas­tardyń yǵynda, qaǵa beristerde jatqan kúl-qoqys ta jınaldy. Baqandaı bir jarym tonna.

– Búgingi aksııa el nazaryn ózine aýda­rýǵa tıis. Basqa jurt ta baǵaly bas­ta­many ilip áketse, jarasymdy bo­lar edi. Biz tabıǵatty tazalaýmen qatar el sana­syn da tazalaýymyz kerek, – deıdi Kazakh Tourism ulttyq kompanııa­sy­nyń tóraǵasy Erjan Erkinbaev.

Býrabaıdyń jartasy ǵana emes, bıshi qaıyńdary da, máńgi jasyl qaraǵaıy da jaraly edi. Sońǵy kezde aq baltyrly qaıyńǵa oramal baılaý ádeti shyqqan. Múmkin eskertkish sanaıtyn shyǵar, álde kıeli jerge degen qurmet pe eken? Qalaı bolǵan kúnde de ilkiden kele jatqan ejelgi salt-dástúr emes, búginginiń búı­rekten sıraq shyǵarǵan jartylaı jabaıy tanym-túsinigi. Qazir aq shyt ora­maldyń janynda jaman tumaýdan qorǵaıtyn betperde de ilýli tur. Bul – en­di naǵyz shekten shyqqandyq.

Jartastardyń betindegi aıǵyz-aı­ǵyz jazýlardy óshirý úshin hımııalyq eritindiler de paıdalanyldy. Munyń barlyǵy tabıǵatqa kinárat keltirmeı, uqyp­ty jasaldy. Endi tabıǵatqa taǵy­lyq kórsetýden taıynbaıtyn tentekter aıylyn jııatyn shyǵar. Aıtpaqshy, bul ıdeıa ótken jyly ómirge kelgen. Býrabaı baýraıyndaǵy týrıstik baǵyttardy qalyptastyrý kezinde Erjan Erkinbaev kótergen bolatyn. Arada bir jyl ótken­nen keıin qoldaý taýyp, kópshilik bilek biriktire kirisken soń kógildir nurǵa bó­lengen Býrabaıdyń baýraıyn kóp-kórim jaqsaryp qaldy.

Sóz arasynda mamyr aıynyń basynda eriktiler Ile Alataýyndaǵy ulttyq park­tiń jartastaryn tazartqanyn aıta keteıik. El ishinde osyndaı ilkimdi is qolǵa alynyp, ony jalpy jurt qýattap jat­sa, tól tabıǵatymyzdy kózdiń qara­shy­­ǵyn­daı saqtaý kerek deıtuǵyn ataly sóz­diń asta­ryndaǵy mazmun jas tolqyn­nyń jadyna shymshymdap sińip, jattalyp qalar edi-aý.