Eýropa chempıonatynyń jerebe tartý rásimi 2019 jyldyń 30 qarashasynda Rýmynııanyń astanasy – Býharestte ótken edi. Sonyń qorytyndysy boıynsha 24 komanda tórt-tórtten alty topqa bólindi. Olar 11 maýsym men 11 shilde aralyǵynda jarys kórigin qyzdyryp, chempıon men júldegerlerdi anyqtaıdy. Sonymen, toptyq týrnırde tómende kórsetilgen memleketter ókilderi ózara sheberlik baıqasady:
A toby: Túrkııa, Italııa, Ýels jáne Shveısarııa. Oıyndar Rım men Bakýde ótedi.
V toby: Danııa, Fınlıandııa, Belgııa jáne Reseı. Oıyndar Kopengagen men Sankt-Peterbýrgte ótedi.
S toby: Nıderland, Ýkraına, Aýstrııa jáne Soltústik Makedonııa. Oıyndar Býharest pen Amsterdamda ótedi.
D toby: Anglııa, Horvatııa, Shotlandııa jáne Chehııa. Oıyndar London men Glazgoda ótedi.
E toby: Ispanııa, Shvesııa, Polsha jáne Slovakııa. Oıyndar Sankt-Peterbýrg pen Sevılıada ótedi.
F toby: Majarstan, Portýgalııa, Fransııa jáne Germanııa. Oıyndar Býdapesht pen Mıýnhende ótedi.
Tusaýkeser kezdesý kóne qala – Rımde uıymdastyrylyp, onda Italııa men Túrkııa quramalary kúsh synasady. Ár toptyń úzdik eki komandasy pleı-off kezeńine joldama alady. Úshinshi oryndy ıelengender arasynan molyraq upaı jınaǵan tórt eldiń ókilderi de dál sondaı qurmetke bólenedi. 1/8 fınaldyq kezdesýler 26-29 maýsym kúnderi ótedi. 2-3 shilde kúnderi shırek fınaldyq matchtardyń kýási bolamyz. 6-7 shildede jartylaı fınaldyq jáne 11 shildede aqtyq saıystardy tamashalaımyz. Sheshýshi oıyndardyń úsheýin de Anglııanyń astanasy – London qabyldaıdy.
«Eýro-2020» básekeleri barysynda erekshe nazar aýdarýǵa turarlyqtaı birneshe jaıt bar. Qart qurlyqtyń basty dodasynda alǵash ret VAR júıesi qoldanylady. Árbir match barysynda bes oıynshyny almastyrýǵa bolady. Eger oıyn qosymsha ýaqytqa ulassa, onda altynshy fýtbolshyny almastyrýǵa ruqsat beriledi. Sonymen qatar ár eldiń ulttyq quramasy sapynda burynǵydaı 23 emes, 26 oıynshy jasyl alańǵa shyǵa alady.
Oıyndar ótetin stadıondar jaıynda qysqasha málimet bere keteıik.
Eýropa chempıonatynyń oıyndary Londondaǵy «Ýemblı» (90 000 kórermenge eseptelgen), Mıýnhendegi «Alıans Arena» (75 000), Rımdegi «Olımpıadalyq stadıon» (72 698), Bakýdegi «Olımpıadalyq stadıon» (70 000), Býdapeshttegi «Ferens Pýshkash atyndaǵy stadıon» (65 156), Sankt-Peterbýrgtegi «Gazprom Arena» (61 000), Sevılıadaǵy «Olımpıadalyq stadıon» (60 000), Býharesttegi «Ulttyq stadıon» (54 851), Amsterdamdaǵy «Iohan Kroıf Arena» (53 052), Kopengagendegi «Parken» (51 711) jáne Glazgodaǵy «Hempden Park» (51 472) syndy talaı jylǵy tarıhy bar záýlim stadıondarda ótedi.
Bıylǵy Eýropa chempıonatynyń júlde qory da óte qomaqty. Qatysýshy komandalardyń barlyǵyna 9,25 mıllıon eýrodan tapsyryldy. Toptyq týrnırdegi árbir jeńis 1,5 mıllıonǵa baǵalansa, upaı bólisken jaǵdaıda sol somanyń teń jartysy beriledi. Pleı-offqa joldama alǵandar 2 mıllıonnan enshilese, shırek fınalǵa shyqqandar 3,25 mıllıonnan ıemdenedi. Jartylaı fınalǵa deıin jetkenderdiń esepshotyna 5 mıllıon aýdarylady. Kúmispen kúptelgen qurama 7 mıllıon alsa, chempıondyq ataqqa qol jetkizgeni 10 mıllıon eýrony oljalaıdy.
