Oqıǵa ornyna jetken jedel tergeý toby kóz jumǵan áıeldiń denesine 23 pyshaq jaraqaty túskenin anyqtap otyr. Tergeý tobynyń boljamynsha, áıel ajal tyrnaǵynan qutylmaq bolyp jan dármen arpalysqa túsip, shamasy jetkenshe qarsylyq kórsetkenge uqsaıdy. О́ıtkeni qoldarynda pyshaq izi qalǵan.
Polısııanyń bastapqy jedel tergeý sharalary nátıjesinde áıeldiń buryn aýyr qylmys jasaǵany úshin sottalǵan kórshisiniń qolynan mert bolǵany anyqtaldy. Tártip saqshylary 40-tan astam aýyl turǵynynan jaýap alǵan. Olardyń biri polısııa surap otyrǵan adamǵa uqsaıtyn bireýdiń ormanǵa qaraı ketip bara jatqanyn kórgenin aıtqan.
Osylaısha, oblysta dereý «Ustaý» sharasy jarııalanyp, kóp keshikpeı aýyldan 40 shaqyrym uzap úlgergen kúdikti kózge iligedi. Polıseılerdi baıqap qalǵan er adam sol mańaıdaǵy omartanyń qasynda turǵan vagonǵa qaraı qasha jónelgen.
«Ustaý barysynda ol qatty qarsylyq kórsetip, polıseılerdiń birine pyshaq jaraqatyn saldy. Ustaý toby oǵan qarýyn tastap, óz erkimen polısııaǵa berilýin surady. Odan keıin joǵaryǵa qaraı eskertý oǵy atyldy. Alaıda kúdikti munyń birine qulaq aspaı, tártip saqshylaryna pyshaq silteı bastady. Adam ómirine tónip turǵan qaýip pen sol mańdaǵy azamattardyń qaýipsizdigi eskerilip, ustaý kezinde tabeldik qarýdan oq atýǵa týra keldi. Er adam alǵan jaraqatynan kóz jumdy. Qazir tabeldi qarý qoldanýdyń qanshalyqty zańdy bolǵany tekserilip jatyr», dep málimdedi oblystyq PD-nyń baspasóz qyzmeti.
Sondaı-aq polısııa QR Qylmystyq kodeksiniń 99-babynda kórsetilgen kisi óltirý qylmysy boıynsha sotqa deıingi tergeý sharalaryn bastady. Kúdiktiniń qolynan kóz jumǵan áıeldiń artynda 3 jasar jáne 10 aılyq eki balasy jetim qaldy.
