«Osy qaýlyǵa qosymshaǵa sáıkes Baǵys jáne Hıebon eldi mekenderiniń jalpy alańy 795,62 gektar jerin Túrkistan oblysynyń shekarasyna qosý arqyly Túrkistan oblysynyń shekarasy ózgertilsin», delingen Úkimet qaýlysynda.
Aýdany 750 gektar Baǵys aýyly Aqjar aýyldyq okrýgine, aýdany 45,62 gektar Hıebon aýyly Túrkistan oblysy Saryaǵash aýdany Qurkeles aýyldyq okrýginiń shekarasyna qosylady. Qazaqstan men О́zbekstan shekarasynyń ýchaskeleri týraly shartqa eki eldiń tuńǵysh prezıdentteri 2002 jyly qol qoıǵan. Endi osyǵan deıin О́zbekstanǵa tıesili bolǵan bes eldi mekeni bar Baǵys kenti men Arnasaı bógeti shart boıynsha Qazaqstanǵa berildi.
Túrkistan oblysynyń baspasóz qyzmeti málimdegendeı, Shekara mańyndaǵy Baǵys aýyly Ońtústik Qazaqstan oblysynyń Saryaǵash qalasynan 40 shaqyrym jerde ornalasqan. 2009 jylǵy sanaq boıynsha, aýylda 1143 adam (563 er adam jáne 580 áıel adam) turǵan. Onda 19 jyl resmı tirkeýsiz turǵan úıler de bar. Eldi meken resmı túrde Qazaqstan kartasyna engizilmegen. Bul máseleni turǵyndar da birneshe ret ákimdikke baryp kótergen. Alaıda oblys ákimdigi Baǵys aýylynyń problemalaryn sheshýde eki eldiń Syrtqy ister mınıstrligi sheshýi tıis «zańdy aspektiler» bar dep eseptegen.
Úkimetke Baǵys jáne Hıebon aýyldarynyń jaǵdaıyn anyqtaýdy el Prezıdenti Qasym-Jomart Toqaev tapsyrǵan. 16 naýryzda premer-mınıstrdiń orynbasary Eraly Toǵjanov bastaǵan jumys toby aýyl turǵyndarymen kezdesti. Sol kezde turǵyndar menshik pen jer telimderin rásimdeý múmkindigi joq ekenin aıtyp másele kótergen bolatyn. Turǵyndardyń aıtýynsha, aýyl sharýashylyǵy men mal sharýashylyǵy úshin jer men sýarmaly sýdyń jetispeýshiligi de ótkir másele bolyp otyr. Sonymen qatar aýyldarda gaz joq.
Kezdesý qorytyndysy boıynsha premer-mınıstrdiń orynbasary oblys ákimdigine turǵyndardyń problemalyq máselelerin sheshý boıynsha barlyq sharany qabyldaýdy tapsyrdy. Nátıjesinde, eldi mekenderge resmı mártebe berildi, olardyń shekaralary bekitildi, jer ýchaskeleri men múlikterin túgendeý aıaqtaldy. Shildede óńirdiń alty aýyly tabıǵı gazben qamtamasyz etilmek, al kelesi jyly Baǵys aýylynda 300 oryndyq mektep salynady.
Sonymen qatar Qazaqstan SIM ókilderi Baǵys aýyly aýdanyndaǵy memlekettik shekara ýchaskesin demarkasııalaý 2004 jyly júrgizilgenin habarlady. Qazaqstan-О́zbekstan memlekettik shekarasyn demarkasııalaý týraly shart jasasý arqyly О́zbekstanmen shekarany demarkasııalaýdy aıaqtaý bir-eki jyl ishinde josparlanyp otyr. Bul rette, mınıstrliktiń paıymdaýynsha, bul sharttyń bolmaýy Baǵystaǵy jer ýchaskelerin rásimdeý jónindegi jumystardy júrgizýge quqyqtyq jaǵynan kedergi emes.
