«Jedel qyzmetterdiń málimeti boıynsha, Qazaqstanda aýyr jáne asa aýyr qylmystan taıynbaıtyn 40-tan astam top bar. Olardyń ıeliginde kóptegen qarý-jaraq pen iri adam kapıtaly bar, qarjylyq turǵyda táýeliz», delingen málimette.
Quqyq qorǵaý organdary 2020 jyldyń ózinde ǵana 10 qylmystyq topty joıyp, 40-tan astam top serkeleri men múshelerin ustaǵan eken. Solardyń arasynda «Aıshýaq-Jantúgel» degen atpen belgili uıymdasqan qylmystyq toptyń 7 belsendi múshesi de bar. Kúdiktiler qaýipsizdik qyzmetiniń qolyna 2020 jyldyń qarashasynda túsken bolatyn.
«Tergep-tekserý kezinde qylmystyq toptyń yqpaly 2018 jyly Sarybulaq kólinde zańsyz balyq aýlaý kásibine baqylaý ornatqan kezden bastap, keńeıe túskeni belgili boldy. Qolǵa túsken top músheleri Almaty bazarlary men «Saıran» avtobeketin jáne basqa da nysandardy «baqylaýda» ustaǵandary anyqtaldy. «Alataý», «О́jet», «Kenjehan» bazarlarynyń kásipkerlerine «qamqorlyq» kórsetip, atalǵan bazarlar men «Baraholkanyń» avtoturaqtaryn da baqylaýda ustaǵan. Top músheleri qatysqan adam urlaý jáne basqa qylmystarmen baılanysty qylmystyq epızodtar áshkerelendi», deıdi UQK qyzmetkerleri.
Ustalǵandardyń ústinen kisi óltirý, qaraqshylyq shabýyl, bopsalaý jáne ozbyrlyq faktileri boıynsha 17 qylmystyq is qozǵaldy. Oǵan Ulttyq qaýipsizdik komıteti men Ishki ister mınıstrliginiń ókilderi jınaǵan derekter negiz bolǵan.
«Toptyń jekelegen músheleriniń 2016 jyly qylmys áleminiń bedeldi ókili bolǵan Nurbekovtiń ólimine qatysy týraly málimetter jınaldy. Qazirgi tańda atalǵan toptyń qalǵan múshelerin anyqtaý jáne ustaý boıynsha jumystar júrip jatyr», delingen UQK málimetinde.
