Bul jádiger HIH ǵasyrǵa tıesili, ony jasaǵan adamnyń esimi belgisiz, sonda da qolynan bal tamǵan sheber aǵashtósekti ulttyq naqyshpen ásem órnektegen. Atalǵan murajaıdyń qor saqtaýshysy Kámshat Ábjanovanyń aıtýynsha, ol ótken ǵasyrdyń 70-jyldary Almatydaǵy mýzeıden kelgen. Ony murajaıǵa kim tapsyrǵany týraly naqty derek joq. Alaıda Amangeldi atamyzdyń anasynyń aǵashtósegi ekendigi anyq dáleldengen. Qundy jádigerge eki ǵasyrǵa jýyq ýaqyt bolsa da jaqsy saqtalǵan.
1916 jylǵy Torǵaıdaǵy ult-azattyq kóterilisiniń bas sardary Amangeldiniń anasy tekti jerden shyqqan. Ol Berdikeı rýynyń ishindegi Qulmuhammed ıshan Arystanbaıulynyń áýletinen taraıdy. Qulmuhammed ıshan 1902 jyly qazirgi Qaraǵandy oblysy Ulytaý aýdany aýmaǵyndaǵy Dýlyǵaly degen jerden oıýly qyzyl kirpishten eńseli meshit pen 24 bólmeli medrese saldyrǵan. Bul dinı bilim ordasy sol kezeńde elimizdegi iri rýhanı-mádenı ortalyqtyń biri boldy. Odan birtalaı tanymal tulǵa alǵashqy saýatyn ashqan. Meshit pen medrese ıshandar áýleti qýǵynǵa túskenshe, ıaǵnı 1929 jylǵa deıin jumys istep kelgen. Dýlyǵaly meshitiniń Torǵaıdaǵy ult-azattyq kóterilisinde alar orny zor. Halyq Amangeldini kóterilistiń bas sardary etip saılaǵanda, ıshandar áýleti ony qoldap, batyrǵa batasyn bergen. Dinı uǵymda el arasynda saýat ashý, ǵıbadat aıtý qyzmetin atqarǵanǵa beriletin ıshandyq ataq Qulmuhammed ıshannan bastap, onyń nemeresi Qazı ıshanǵa deıin jalǵasqan. Ulytaý men Torǵaı jurty ıshandar áýletin áli kúnge deıin kıeli tuqym dep qadir tutady.
