Dýbaıdaǵy dodada Erik Alǵabek jattyqtyratyn Qazaqstan qyzdar quramasynyń 9 boksshysy fınalǵa shyǵyp, 8 jerlesimiz Azııa chempıony degen mártebeli ataqqa ıe boldy. О́kinishke qaraı, 57 kıloda byltyr el chempıony atanǵan qostanaılyq Vladıslava Kýhta altyn medal úshin ótken jekpe-jekte ózbekstandyq qarsylasy Sıtora Turdybekovaǵa 0:5 esebimen jol berip, kúmis júldege ıe boldy. Bul – Kýhtanyń qurlyqtyq týrnırde jeńip alǵan alǵashqy júldesi. Buǵan deıin jasóspirimder arasynda synǵa túsken ol 2015 jyly ótken álem chempıonatynyń qola júldesin oljalaǵan bolatyn. Eresekter dýyna jańadan qosylǵan Vladıslava úshin Azııa birinshiliginiń kúmis júldesi jaman nátıje emes.
Al 2012 jylǵy London Olımpıadasynyń 75 kılo salmaqta qola júldegeri, 2010 jylǵy álemniń jáne Azııanyń kúmis júldegeri Marına Volnova araǵa 11 jyl salyp, sary qurlyqtyń qola júldesine qol jetkizdi. Olımpııa oıyndarynan keıin turmysqa shyǵyp, sporttan biraz ýaqyt qol úzip qalǵan Volnova 2019 jyly úlken rıngke qaıta oralǵan edi. Otandasymyz jartylaı fınalda О́zbekstan ókili Mavlýda Maýlenovadan aılasyn asyra almady.
Fınaldyq jekpe-jekterge toqtalar bolsaq, Qazaqstan quramasynan birinshi bolyp rıngke 48 kılo salmaqtaǵy Alýa Balqybekova shyǵyp, el qorjynyna alǵashqy altyn júldeni saldy. Fınalda ózbekstandyq boksshy Gýlasal Sýltonalıevamen judyryqtasqan qandasymyz aıqyn basymdyqpen jeńip, Azııa chempıony atandy. О́zbek qyzy Balqybekovaǵa jaqsy tanys. О́ıtkeni ekeýi 2019 jyly Ulan-Ýdede (Reseı) álem chempıonatynyń alǵashqy aınalymynda kezdesip, sol aıqasta Sýltonalıeva jeńiske jetip edi. Mine, araǵa eki jyl salyp Alýa ózbekstandyq boksshyda ketken esesin qaıtardy.
Jalpy, bul – jeńil salmaqtaǵy boksshymyzdyń úshinshi Azııa chempıonaty. 2017 jáne 2019 jyldary uıymdastyrylǵan sary qurlyq dodasyna qatysqanymen, Balqybekovaǵa júldeli oryndardan kóriný buıyrmaǵan edi. Sóıtip, Azııa birinshiligindegi úshinshi múmkindiginde óz degenine jetip, altynnan alqa taqty.
Kóp keshikpeı qyzdar arasynda Qazaqstannyń 10 dúrkin jeńimpazy Nazym Qyzaıbaı rıngke kóterildi. Jartylaı fınalda Shrı-Lanka ókilin úsh ret nokdaýnǵa túsirip, jekpe-jekti ýaqytynan buryn aıaqtaǵan Nazym fınalda álemniń alty dúrkin chempıony, Olımpııa oıyndarynyń qola júldegeri áıgili úndistandyq Merı Kommen judyryqtasty. Jartylaı fınaldy erte aıaqtap, kúshin fınalǵa saqtaǵan qandasymyz aqtyq synda aıanyp qalmady. Qarsylasynyń ataǵy jer jaryp turǵanymen, 38 jasqa taıaǵan Merı Kom Qyzaıbaıǵa qarsy eshqandaı qarsy shara qoldana almady. Otandasymyz jyldamdyǵynyń arqasynda qarsylasynyń aldyn orap, tóreshilerdiń basym daýysymen jeńiske jetti. Eki boksshy buǵan deıin 2016 jyly Qytaıdaǵy lısenzııalyq týrnırde jolyǵyp, Merı Komnyń mereıi ústem bolǵan edi.
Taǵy bir aıta keterligi, bul – Nazym Qyzaıbaıdyń jańa salmaqtaǵy alǵashqy iri jeńisi jáne alǵashqy altyn júldesi. Eki márte álem chempıonatynda atoı salǵan qandasymyz buǵan deıin 48 kılo salmaqta óner kórsetken edi.
Al 54 kılo salmaqta kúsh synasqan Dına Jolaman alǵashynda fınaldan tys qalǵan bolatyn. О́ıtkeni jartylaı fınaldaǵy jekpe-jekte tóreshiler úndistandyq Sakshı 2:3 esebimen jeńiske jetti dep sheshim shyǵarǵan edi. Alaıda qazaqstandyq tarap shaǵym túsirip, kezdesý nátıjesi qaıta qaraldy. Keıinnen tóreshiler sheshimin ózgertip, jeńisti qazaqstandyq boksshyǵa berdi. Azııa chempıonatyn qola júldemen qorytyndylaıyn dep turǵan jerlesimiz fınaldan bir-aq shyǵyp, altyn úshin bolǵan aıqasta ózbekstandyq Sıtora Shogdarovany jeńdi. Sóıtip, Dına Jolaman da Azııa chempıony atandy.
60 kılo salmaqtaǵy tájirıbeli boksshymyz Rımma Volosenko chempıondyq ataqqa merziminen buryn qol jetkizdi. Indonezııalyq qarsylasy Hýsvatýn Hasanmen judyryqtasqan Volosenko bar máseleni alǵashqy raýndta-aq sheship tastady. Otandasymyzdyń aýyr soqqysynan keıin Hýsvatýn birinshi raýndta eki ret nokdaýnǵa túsken soń, tóreshiler jekpe-jekti ári qaraı jalǵastyrýdyń qajeti joq dep sheshti.
El qorjynyna besinshi altyn júldeni Mılana Safronova (64 kg) saldy. 2019 jylǵy álem jáne Azııa birinshilikteriniń qola júldegeri atanǵan jerlesimiz fınalda taǵy bir úndistandyq boksshy – Lalbýatsaıhıdi tóreshilerdiń basym daýysymen utty.
Fınalda ózbekstandyq qarsylasy Navbahor Hamıdovany aıqyn basymdyqpen jeńgen Valentına Halzova (69 kg) altynshy altynnyń ıegeri atandy. Bir qyzyǵy, bul Halzovanyń Azııa birinshiligindegi alǵashqy jekpe-jegi edi. Sebebi soqyr jerebe otandasymyzǵa birden fınalda aıqasýǵa múmkindik berdi. Jalpy, boks tarıhynda bir jekpe-jek ótkizip-aq chempıon ataný – óte sırek kezdesetin jaǵdaı. Munyń sebebin bul jolǵy chempıonatqa Qytaı, Koreıa, Taıland, Japonııa boksshylarynyń pandemııanyń saldarynan kelmeýimen dep túsindirýge bolady.
Aýyr salmaqtaǵy otandasymyz Farıza Sholtaı (81 kg) da fınalda ózbekstandyq jas boksshy Sohıba Rýzmetovamen judyryqtasty. Osydan bir aı buryn Polshanyń Kelse qalasynda óz máresine jetken bokstan jastar arasyndaǵy álem birinshiliginiń qola júldesin oljalaǵan Rýzmetova tájirıbeli boksshymyzǵa esh qarsylyq kórsete almady. 2019 jyly Taılandtaǵy Azııa chempıonatynda qola medal alǵan otandasymyz araǵa eki jyl salyp, Azııa chempıonatynda top jardy.
Bıylǵy Azııa birinshiligindegi segizinshi altyn júldeni el qorjynyna Lázzat Kúngeıbaeva (+81 kg) saldy. Ulttyq quramanyń eń tájirıbeli boksshysy halyqaralyq jarystarda jáne álem chempıonattarynda atoı salyp júrgenimen, Azııa bıigin endi ǵana baǵyndyrdy. Buǵan deıin Kúngeıbaeva úsh ret sary qurlyqtyń qola (2015, 2017, 2019), bir márte (2012) kúmis júldesine ıe bolǵan edi. Jerlesimiz fınalda Úndistan ókili Anýpamany tóreshilerdiń sheshimi boıynsha jeńdi.
Osylaısha, bokstan Qazaqstannyń áıelder quramasy Birikken Arab Ámirlikterindegi jarysty 8 altyn, 1 kúmis jáne 1 qola medalmen qorytyndylady. Osy nátıjemen jalpykomandalyq esepte birinshi oryndy ıelendik. Alty boksshysy fınalǵa shyqqan О́zbekstan quramasynyń tek bir ókiline ǵana altyn júlde buıyrdy. Qalǵan bes boksshysy qarsylastaryna jol berip, kúmis júldeni qanaǵat tutty. Sóıtip, О́zbekstan quramasy 1 altyn, 5 kúmis, 2 qolamen jalpy esepte ekinshi orynǵa taban tiredi. Úshinshi orynda – Úndistan quramasy. Olar 1 altyn, 3 kúmis jáne 6 qolany qorjynǵa saldy. Bul jarysta 10 memlekettiń ókiline jeńis tuǵyryna kóterilý baqyty buıyrdy.
Osyǵan deıin uıymdastyrylǵan qyzdar arasyndaǵy Azııa birinshiliginde Qazaqstannyń Gımni 4 retten artyq shyrqalǵan emes. Eń eleýli tabysqa biz osydan 11 jyl buryn qol jetkizgen edik. 2010 jyly elordada ótken baıraqty básekede Jaına Shekerbekova (54 kg), Saıda Hasenova (64 kg), Darıǵa Shákimova (75 kg) jáne Marına Volnova (+81 kg) bas júldeni oljalaǵan bolatyn.
