Qazaqstan Respýblıkasynyń Memlekettik rámizderi – Eltańba, Tý jáne Gımn kúni qarsańynda elordada patrıotızm rýhyn nyǵaıtýǵa, memlekettik rámizderdi qurmetteýdi nasıhattaýǵa baǵyttalǵan birqatar ımıdjdik is-sharalar josparlanǵan. Olardyń barlyǵy «Men Qazaqstannyń patrıotymyn!» uranymen ótedi.
Is-sharalardyń arasynda QR Memlekettik Ánuranyn bir mezgilde oryndaý, aqparattyq saǵattar, dóńgelek ústelder, konferensııalar, dárister, semınarlar, kitap kórmeleri, jas memlekettik qyzmetshilerdiń ant qabyldaýy sekildi jıyndar bar. 100-den astam túrli is-shara sanıtarlyq-epıdemıologııalyq normalardy saqtaı otyryp ótkizilmek.
2021 jyldyń 2 maýsymynan bastap «Meniń rámizderim – meniń maqtanyshym!» patrıottyq chellendj-aksııasy ótedi. Ony qoldaýǵa elorda turǵyndary men qonaqtary shaqyrylady. Facebook jáne Instagram jelisinde memlekettik rámizdermen baılanysty foto nemese beınetúsirilimder, túrli posttar #MenińrámizderimMenińmaqtanyshym, #Memlekettikrámizderkúni, #MenQazaqstannyńpatrıotymyn, #IаpatrıotKazahstana heshtegterin paıdalana otyryp jarııalanýy qajet.
Sonymen qatar qoǵamdyq oryndarda ornalastyrylǵan LED-ekrandarda, bilim berý, mádenıet, sport, medısına, SOO uıymdarynda jáne qoǵamdyq kólik monıtorlarynda memlekettik rámizder týraly aýdıo jáne beınerolıkter kórsetiletin bolady.
4 maýsym kúni saǵat 11:00-de «Atameken» «Qazaqstan Kartasy» etno-memorıaldyq kesheniniń janynda qala ákimdiginiń jastar saıasaty máseleleri basqarmasynyń uıymdastyrýymen jyl saıynǵy avtosherý bastalady. QR Memlekettik týy bar 50 mashınadan turatyn avtokerýen elordanyń basty dańǵyldary men kóshelerinen – Táýelsizdik, Turan, Máńgilik El, Uly Dala, Qabanbaı batyr, Túrkistan sekildi tustardan 29 km júrip ótedi. Avtosherý «Otan Qorǵaýshylar» memorıalynyń janyna kelip toqtaıdy.
Sol kúni saǵat 15:00-de mereke qurmetine Nur-Sultan qalasynyń memlekettik akademııalyq fılarmonııasynyń ártisteri «Astana» konsert zalynda konsert uıymdastyrady. Kórermender Maıra Ilııasova, Altynaı Jorabaeva, Rústem Júginisov, Gúlnur Orazymbetova, Svetlana Aıtbaeva syndy ánshilerdiń oryndaýyndaǵy patrıottyq shyǵarmalardy tyńdaıdy. Is-sharaǵa kirý «Ashyq» mobıldi qosymshasy arqyly júrgiziledi.
Memlekettik rámizder kúniniń qurmetine oraı ári patrıottyǵyn kórsetý úshin elordalyqtar úıleriniń balkondary men terezelerine Qazaqstan Respýblıkasynyń Memlekettik Týyn ile alady.
